پانچ عالمی ممالک یعنی آسٹریلیا، جرمنی، اٹلی، نیوزی لینڈ اور برطانیہ کے وزرائے خارجہ نے مشترکہ طور پر غزہ پر اسرائیل کے مکمل قبضے کے منصوبے کی سخت مذمت کی ہے۔ ان وزرائے خارجہ نے اپنے جاری کردہ بیان میں غزہ میں بڑے فوجی آپریشن کے اسرائیلی فیصلے کو مسترد کرتے ہوئے عالمی برادری سے مسئلہ فلسطین کے دیرپا حل کے لیے دو ریاستی حل پر عمل درآمد کے عزم کا اعادہ کیا ہے۔
مشترکہ بیان میں اسرائیل پر زور دیا گیا کہ وہ بین الاقوامی امدادی تنظیموں کی رجسٹریشن کے نظام میں ترمیم کے لیے فوری طور پر کوئی مؤثر حل تلاش کرے تاکہ امدادی کام بلا روک ٹوک جاری رہ سکیں اور انسانی ہمدردی کی بنیاد پر امداد فلسطینیوں تک پہنچ سکے۔
دوسری جانب، غزہ کی صورتحال پر اقوام متحدہ کی سلامتی کونسل کا ہنگامی اجلاس آج طلب کر لیا گیا ہے۔ عرب میڈیا رپورٹس کے مطابق سلامتی کونسل کے 15 رکن ممالک میں سے 14 نے اس اجلاس کی حمایت کی ہے، تاہم امریکہ نے اس اجلاس کے انعقاد کی مخالفت کی ہے۔واضح رہے کہ اسرائیلی کابینہ نے غزہ پر مکمل قبضے کا فیصلہ کرنے کے بعد جمعہ کو بھی غزہ میں فلسطینیوں کے خلاف جارحیت جاری رکھی۔ تازہ بمباری کے باعث 11 امدادی کارکنوں سمیت کم از کم 36 فلسطینی شہید ہو گئے ہیں، جبکہ متعدد زخمی بھی ہوئے ہیں۔ یہ کارروائیاں غزہ کی ہولناک انسانی صورت حال کو مزید سنگین بنا رہی ہیں۔بین الاقوامی برادری میں بڑھتی ہوئی تشویش کے باوجود، مسئلہ فلسطین کے حل کے لیے سیاسی کوششیں جاری ہیں، مگر زمینی حقائق اور اسرائیلی کارروائیاں امن کے امکانات کو محدود کر رہی ہیں۔
