گوجرانوالہ (باغی ٹی وی، نامہ نگار محمد رمضان نوشاہی)تھانہ اروپ پولیس نے موٹر سائیکل چوری اور ڈکیتی کی متعدد وارداتوں میں ملوث خطرناک گینگ کے سرغنہ سمیت پانچ ارکان کو گرفتار کر لیا۔
گرفتار ملزمان میں شفیق خان، رضا خان، حمزہ خان، سلمان خان اور ریاض خان شامل ہیں۔ پولیس کے مطابق ملزمان کے قبضے سے 15 عدد چوری شدہ موٹر سائیکل، 2 رکشے اور 5 لاکھ 50 ہزار روپے نقدی برآمد کر لی گئی۔ ایس ایچ او اروپ انسپکٹر صفدر عطاء کی زیرِ نگرانی ٹیم نے جدید سائنسی طریقہ کار اور سی سی ٹی وی فوٹیجز کی مدد سے ملزمان کو ٹریس کر کے گرفتار کیا۔
سی پی او گوجرانوالہ محمد ایاز سلیم نے کہا کہ سماج دشمن عناصر کے خلاف کارروائیاں بلاامتیاز جاری رہیں گی تاکہ شہریوں کو پُرامن ماحول فراہم کیا جا سکے۔ ترجمان ضلعی پولیس گوجرانوالہ کے مطابق ملزمان کے خلاف مزید تفتیش جاری ہے۔
