گوجرانوالہ (باغی ٹی وی نامہ نگار محمد رمضان نوشاہی)گوجرانوالہ پولیس میں کرپشن اور اختیارات کے ناجائز استعمال کا بڑا کیس سامنے آگیا۔
طمعِ نفسانی اور رشوت لے کر اغوا کا جھوٹا مقدمہ درج کرنے، شہری سے اشٹام پیپر پر زبردستی دستخط کروانے اور جبراً رقم وصول کرنے کے الزام میں تھانہ سبزی منڈی کے ایس ایچ او سمیت تین پولیس افسران کو گرفتار کر لیا گیا۔
سٹی پولیس آفیسر محمد ایاز سلیم نے واقعہ کا فوری نوٹس لیتے ہوئے ایس ایس پی آپریشنز غیور احمد کو انکوائری کے احکامات جاری کیے۔
انکوائری رپورٹ میں الزامات درست ثابت ہونے پر ایس ایچ او انسپکٹر لقمان، سب انسپکٹر غلام فرید، اور اے ایس آئی خالد کو قصوروار قرار دے کر گرفتار کر لیا گیا۔
سی پی او محمد ایاز سلیم کے حکم پر تینوں افسران کو تھانہ سبزی منڈی کی حوالات میں بند کر دیا گیا اور ان کے خلاف مقدمہ درج کر لیا گیا۔
مقدمے میں اغوا، جبراً رقم وصولی اور اختیارات سے تجاوز کی دفعات شامل کی گئی ہیں۔
سی پی او محمد ایاز سلیم نے کہا کہ محکمہ پولیس کی بدنامی کا باعث بننے والی کالی بھیڑوں سے کوئی رعایت نہیں برتی جائے گی۔انہوں نے واضح کیا کہ کرپشن اور اختیارات کے ناجائز استعمال پر ملوث افسران جیل جائیں گے، کیونکہ محکمہ پولیس میں بدعنوانی کی کوئی گنجائش نہیں۔
