ریاض: سعودی عرب میں غیر معیاری کھجوریں ذخیرہ کر کے نئے ایکسپائری لیبل کے ساتھ دوبارہ فروخت کرنے میں ملوث غیر قانونی تارکین وطن کو گرفتار کیا گیا ہے۔
باغی ٹی وی: سعودی عرب کے شہر جنوبی ریاض میں ایک اپارٹمنٹ کے اندر آدھی رات کو وزارت تجارت کی ٹیم نے وزارت انسا نی وسائل اور سعودی فوڈ اینڈ ڈرگ اتھارٹی کے ساتھ مل کر چھاپہ مارا، اور ایکسپائری تاریخوں کو نئی تاریخوں سے بدل کر رکھے گئے پھلو ں کی پریمیم اقسام کے لیبل والے پیکٹ قبضے میں لیے،علاوہ ازیں اس دوران سات مشتبہ افراد کو مملکت کے اینٹی کمرشل فراڈ قا نون کی خلاف ورزی پر گرفتار کرکے پبلک پراسیکیوشن کے حوالے کیا۔
ضبط شدہ سامان میں 400 کلو گرام غیر معیاری کھجوریں، 3000 خالی پلاسٹک کے پیکٹ، 5000 گتے کے کریٹس جو پیکینگ کے لیے استعمال ہوتے ہیں، 100,000 اسٹیکرز جن پر کھجور کے متعدد برانڈز کے نام اور جعلی ایکسپائری لیبل شامل تھے سعودی قانون کے تحت، تجارتی دھوکہ دہی کی سزا تین سال تک قید اور زیادہ سے زیادہ 10 لاکھ ریال جرمانہ ہے اس کے علاوہ حتمی فیصلہ جاری ہونے کے بعد مجرم کو شرمندہ کرنے کیلئے اس کے نام کی تشہیر بھی شامل ہے،اور اگر مجرم غیر ملکی ہے تو اسے مملکت سے جلاوطن کر دیا جائے گا اور دوبارہ داخلے سے روک دیا جائے گا۔
