پاکستان کے سابق نگراں وزیراعظم اور موجودہ سینیٹر انوار الحق کاکڑ نے کہا ہے کہ مغرب اب یہ حقیقت سمجھ چکا ہے کہ جس گھوڑے پر انہوں نے سرمایہ لگایا تھا، وہ پاکستان سے ہار گیا ہے۔
باغی ٹی وی کے مطابق نجی نیوز چینل کے پروگرام میں خصوصی گفتگو کرتے ہوئے سینیٹر کاکڑ کا کہنا تھا کہ مغرب کو گمان تھا کہ پاکستان جواب نہیں دے گا، لیکن اب دنیا میں پاکستان کا تاثر مکمل طور پر بدل چکا ہے۔ پاکستان کو علاقائی سطح پر نئے اتحاد کی ضرورت ہے تاکہ جغرافیائی اور تزویراتی خطرات سے نمٹا جا سکے۔انوارالحق کاکڑ نے کہا کہ آج کا سومنات بھارتی انتہا پسند تنظیم آر ایس ایس کا ہیڈکوارٹر ہے اور پاکستان نے اس پر محمود غزنوی جیسے حملے کرکے مودی حکومت کی بدمعاشی کو روکا۔ انہوں نے دعویٰ کیا کہ نہ صرف پاکستان بلکہ چین، بنگلہ دیش اور پورا جنوبی ایشیا بھارت کی شدت پسندی سے خطرے میں ہے۔
انہوں نے مزید کہا کہ بھارت اب تکبر اور مایوسی کے بیچ جھول رہا ہے، اور یہ سچ ہے کہ انڈیا پاکستان کو ہینڈل کرنے کی پوزیشن میں نہیں رہا۔سینیٹر انوارالحق کاکڑ نے پاک فوج کی حالیہ کارکردگی پر تبصرہ کرتے ہوئے کہا کہ اگر فیلڈ مارشل سے بڑا کوئی عہدہ ہوتا تو وہ پاکستان کے سپہ سالار کو دیتا۔ انہوں نے کہا کہ ریاست کے سامنے دہشت گردوں کے حقوق کی کوئی حیثیت نہیں، سول سوسائٹی چاہے دہشت گردوں سے عشق کرتی رہے۔
بلوچ علیحدگی پسند گروہوں کے حوالے سے سینیٹر نے واضح مؤقف اختیار کرتے ہوئے کہا کہ اب معاشرے میں بلوچ دہشت گردی پر کوئی کنفیوژن نہیں رہا۔ اگر گورننس یا کرپشن ہی مسئلہ ہوتا تو تمام بلوچ بندوق نہ اٹھاتے، صرف مخصوص گروہ ہی اس راستے پر کیوں؟ انہوں نے خبردار کیا کہ بھارت بی ایل اے اور ٹی ٹی پی میں مزید سرمایہ کاری کرے گا لیکن پاکستان کی سیکیورٹی فورسز جلد اس اندرونی خطرے پر قابو پالیں گی۔
انہوں نے کہا کہ بھارت گزشتہ پانچ دہائیوں سے تکبر کے خمار میں مبتلا رہا، مگر پاکستان کے دوٹوک جواب اور حکمت عملی نے بھارت کو جھنجھوڑ دیا ہے۔ ان کے مطابق انڈیا اب مایوسی اور تباہی کی راہ پر گامزن ہے۔سینیٹر کاکڑ نے سمندر پار پاکستانیوں سے دو قومی نظریے پر ہونے والی گفتگو کا حوالہ دیتے ہوئے کہا کہ بھارت نے اس پر فالس فلیگ آپریشن کی بنیاد رکھی اور جنگ بھڑکانے کی کوشش کی۔ ان کا کہنا تھا کہ پاکستان مذہبی شناخت پر سمجھوتہ نہیں کرے گا اور اس کے دفاع کے لیے آخری حد تک جائے گا۔
واضح رہے کہ سینیٹر کاکڑ کے یہ بیانات ایک ایسے وقت میں سامنے آئے ہیں جب پاک-بھارت تعلقات میں شدید تناؤ پایا جاتا ہے اور خطے میں بین الاقوامی دلچسپی بڑھتی جا رہی ہے۔
آئی ایم ایف کا پاکستان کے معاشی ایجنڈے پر اعتماد، تعاون جاری رکھنے کی یقین دہانی
پی ایس ایل 10: لاہور قلندرز کی شاندار فتح، کراچی کنگز ٹورنامنٹ سے باہر
کراچی کے لیے بجلی 5 روپے فی یونٹ سستی ہونے کا امکان
ملک بھر میں سونے کی قیمت میں کمی، فی تولہ 1,900 روپے سستا
عازمین حج کے لیے اردو سمیت 8 زبانوں میں صحت آگاہی کٹ متعارف
