میرپورماتھیلو،باغی ٹی وی (نامہ نگارمشتاق لغاری)ضلع گھوٹکی میں 4 لاکھ 77 ہزار بچوں کو پولیو سے بچاؤ کے قطرے پلانے کے لیے انتظامات مکمل کر لیے گئے ہیں۔ ڈپٹی کمشنر ڈاکٹر سید محمد علی نے مہم کا باقاعدہ افتتاح کرتے ہوئے ڈی ایچ کیو ہسپتال پہنچ کر بچے کو پولیو کے قطرے پلائے اور فنگر مارکنگ کی۔ اس موقع پر انہوں نے پولیو واک میں بھی شرکت کی اور عوامی آگاہی فراہم کرنے کی اہمیت پر زور دیا۔
ڈپٹی کمشنر ڈاکٹر سید محمد علی نے کہا کہ پولیو واک کا مقصد لوگوں میں پولیو وائرس کے بارے میں آگاہی فراہم کرنا ہے، اور انہوں نے ضلع کے باشعور افراد سے اپیل کی کہ وہ اپنے علاقوں میں پولیو وائرس کے خلاف عوام کو آگاہ کریں۔ انہوں نے مزید کہا کہ ہم سب کا مشترکہ مقصد پولیو سے پاک پاکستان ہے، اور یہ قومی فریضہ ہے کہ تمام شہری اور متعلقہ ادارے اس مہم میں اپنے کردار کو اہمیت دیں۔
پولیو واک میں اے ڈی ای لیاقت علی کلہوڑو، اے سی میرپور ماتھیلو بابر علی، ڈی ایچ او ڈاکٹر راؤ آفتاب، ڈبلیو ایچ او کے ڈاکٹر نیاز، یونیسیف کے ڈاکٹر رحیم گڈانی اور پولیو ورکرز نے بھی شرکت کی۔ اس موقع پر ان تمام افراد نے پولیو کے خلاف جنگ میں عوامی تعاون کی اہمیت پر زور دیا۔
