نومئی جی ایچ کیو حملہ کیس میں اہم پیشرفت ہوئی ہے، عمران خان کی جانب سے کیس کو تاخیر کا شکار کرنے کے لئے نیا فیصلہ کیا گیا ہے
بانی پی ٹی آئی عمران خان نے 9 مئی جی ایچ کیو حملہ کیس میں لیگل ٹیم میں تبدیلی کر دی ہے،نئی لیگل ٹیم میں ایڈووکیٹ وحید انجم، عرفان نیازی، فیصل چوہدری اور محمد عمران شامل ہیں،بانی پی ٹی آئی عمران خان کی نئی لیگل ٹیم نے اڈیالہ جیل میں ملاقات کیلئے درخواست بھی دائر کر دی ہے،انسداد دہشتگردی عدالت نے جیل حکام کو وکلاء کی عمران خان سے ملاقات کرانے کا حکم جاری کر دیا،پی ٹی آئی کی لیگل ٹیم آج عمران خان سے اڈیالہ جیل میں ملاقات کرے گی.
قبل ازیں انسداد دہشتگردی کی عدالت راولپنڈی نے 9 مئی کو ہونے والے جنرل ہیڈکوارٹرز (جی ایچ کیو) حملہ کیس میں پاکستان تحریک انصاف کے بانی عمران خان کی درخواست بریت خارج کر دی۔عدالت کے جج امجد علی شاہ نے عمران خان کی درخواست پر سماعت کی، جس میں بانی پی ٹی آئی نے آرٹیکل 265 کے تحت اپنے آپ کو بری کرنے کی درخواست دائر کی تھی۔ تاہم، پبلک پراسیکیوٹر ظہیر شاہ نے دلائل دیتے ہوئے کہا کہ ملزم کے خلاف استغاثہ کے پاس کافی شواہد موجود ہیں، اور اس مقدمے میں ٹرائل جاری ہے۔ظہیر شاہ نے مزید کہا کہ اس کیس میں 12 گواہان کے بیانات ریکارڈ ہو چکے ہیں، اس لیے اس وقت بریت کی درخواست منظور نہیں کی جا سکتی۔ ان کا یہ بھی کہنا تھا کہ ٹرائل کے دوران ملزم کو بری کرنے کی کوئی وجہ نہیں بنتی۔
اس پر عدالت نے بانی پی ٹی آئی عمران خان کی درخواست بریت کو مسترد کر دیا اور کیس کی مزید کارروائی جاری رکھنے کا حکم دیا۔
