گوجرہ میں "کھیلتا پنجاب” ہاکی ٹورنامنٹ کا افتتاح

گوجرہ (باغی ٹی وی،نامہ نگارعبدالرحمن جٹ)گوجرہ میں "کھیلتا پنجاب” ہاکی ٹورنامنٹ کا آغاز، سابق رکن قومی اسمبلی خالد جاوید وڑائچ نے افتتاح کیا

تفصیل کے مطابق انٹرنیشنل ہاکی اسٹیڈیم گوجرہ میں "کھیلتا پنجاب” ہاکی ٹورنامنٹ کا آغاز ہو گیا۔ اس ٹورنامنٹ کا افتتاح سابق رکن قومی اسمبلی چوہدری خالد جاوید وڑائچ نے کیا۔ یہ ایونٹ ڈسٹرکٹ سپورٹس ڈیپارٹمنٹ ٹوبہ ٹیک سنگھ کے زیر اہتمام منعقد کیا گیا ہے اور 13 نومبر تک جاری رہے گا۔

افتتاحی تقریب کے دوران چوہدری خالد جاوید وڑائچ نے کہا کہ وزیراعلیٰ پنجاب مریم نواز نے "کھیلتا پنجاب” پروگرام کا آغاز کر کے کھیلوں کے فروغ اور صحت مند معاشرے کی تشکیل کے لیے اہم اقدام اٹھایا ہے۔ ان کا کہنا تھا کہ اس اقدام سے نوجوانوں کو اپنی صلاحیتوں کو اجاگر کرنے اور کھیلوں میں حصہ لینے کے مواقع ملیں گے، جبکہ سپورٹس سرگرمیوں کے ذریعے ایک صحت مند معاشرہ تشکیل پائے گا۔

انہوں نے مزید کہا کہ گوجرہ نے ہمیشہ ہاکی کے میدان میں پاکستان کا نام روشن کیا ہے اور کھیلوں کی سرگرمیاں جاری رہنی چاہئیں۔ اس موقع پر ڈسٹرکٹ سپورٹس آفیسر چوہدری محمد جمیل، ڈائریکٹر ٹورنامنٹ خاور جاوید انٹرنیشنل اور ٹورنامنٹ آرگنائزر سیکرٹری محمد شرجیل سمیت دیگر اہم شخصیات بھی موجود تھیں۔