گوجرہ: موٹر سائیکل اور گدھا ریڑھی میں تصادم، ایک جاں بحق، دوسرا زخمی

گوجرہ (نامہ نگار باغی ٹی وی عبدالرحمٰن جٹ)گوجرہ میں موچی والا روڈ پر موٹر سائیکل اور گدھا ریڑھی کے درمیان تصادم کے نتیجے میں ایک نوجوان جاں بحق جبکہ دوسرا شدید زخمی ہوگیا۔ حادثہ اس وقت پیش آیا جب چک 418 ج۔ب کا رہائشی 17 سالہ غلام رضا اپنے 13 سالہ بھائی محمد رحمن کے ساتھ موٹر سائیکل نمبر TDL_2036 پر شہر سے واپس گاؤں جا رہا تھا۔ راستے میں اچانک سامنے سے آنے والی گدھا ریڑھی سے ٹکرا گئے۔

حادثے کے نتیجے میں غلام رضا موقع پر ہی جان کی بازی ہار گیا جبکہ اس کا بھائی محمد رحمن شدید زخمی ہو گیا۔ واقعے کی اطلاع ملتے ہی مقامی پولیس موقع پر پہنچ گئی اور ریسکیو 1122 نے زخمی اور جاں بحق نوجوان کو سول ہسپتال منتقل کیا۔ محمد رحمن کی حالت تشویشناک ہونے پر ابتدائی طبی امداد کے بعد اسے الائیڈ ہسپتال فیصل آباد ریفر کر دیا گیا۔

پولیس نے جائے وقوعہ کا معائنہ کیا اور حادثے کی وجوہات جاننے کے لیے مزید تحقیقات کا آغاز کر دیا ہے۔ اہل علاقہ نے اس افسوسناک حادثے پر گہرے دکھ کا اظہار کیا ہے۔