گوجرہ (باغی ٹی وی،سٹی رپورٹر محمد اجمل) ٹوبہ پولیس نے عوامی تحفظ اور منشیات کے خلاف جاری آپریشن کے دوران گوجرہ شہر سے ایک شراب فروش کو گرفتار کر کے اس کے قبضے سے 524 پونڈا شراب برآمد کر لی ہے۔
ڈسٹرکٹ پولیس آفیسر (ڈی پی او) ٹوبہ ٹیک سنگھ، عبادت نثار، کی ہدایت پر ضلع بھر میں منشیات اور جرائم پیشہ افراد کے خلاف کارروائیاں جاری ہیں۔ اسی سلسلے میں ڈی ایس پی گوجرہ اشرف تبسم کی زیرِ نگرانی اور ایس ایچ او تھانہ سٹی گوجرہ، سرفراز احمد انسپکٹر، کی سربراہی میں پولیس ٹیم نے ریلوے پھاٹک کے قریب کارروائی کی۔
پولیس نے شراب فروش ملزم فرحان ولد اشفاق قوم راجپوت، سکنہ محلہ نئی منڈی گوجرہ کو رنگے ہاتھوں گرفتار کیا۔ اس کے قبضے سے بڑی مقدار میں 524 پونڈا شراب برآمد ہوئی، جس پر ملزم کے خلاف مقدمہ درج کر لیا گیا ہے۔
ڈی پی او عبادت نثار نے کہا ہے کہ ٹوبہ پولیس شہریوں کے تحفظ کے لیے ہر محاذ پر سرگرم عمل ہے۔
