گوجرہ: فوڈ اتھارٹی کا غیر قانونی سلاٹر ہاؤس پر چھاپہ، مضر صحت گوشت برآمد، دو ملزمان گرفتار
گوجرہ(باغی ٹی وی،نامہ نگارعبدالرحمن جٹ) فوڈ اتھارٹی کا غیر قانونی سلاٹر ہاؤس پر چھاپہ، مضر صحت گوشت برآمد، دو ملزمان گرفتار
تفصیل کے مطابق ڈپٹی ڈائریکٹر پنجاب فوڈ اتھارٹی عدنان حیدر نے اپنی ٹیم کے ہمراہ گوجرہ کے محلہ نیو پلاٹ میں غیر قانونی نجی سلاٹر ہاؤس پر چھاپہ مارا، جس کے دوران 6 من (245 کلوگرام) مضر صحت گوشت برآمد کیا گیا۔ کارروائی کے دوران ملزمان کے قبضے سے ٹی ایم سی کی جعلی سرکاری مہر بھی برآمد کی گئی۔
فوڈ سیفٹی ٹیم نے ملزمان محمد عرفان ولد طفیل ضیاء اور احسان ولد طاہر علی کو گرفتار کر لیا۔ دونوں ملزمان کے خلاف تھانہ سٹی پولیس نے پنجاب فوڈ اتھارٹی ایکٹ 2011 کے تحت مقدمہ درج کر لیا ہے۔
ڈپٹی ڈائریکٹر عدنان حیدر کا کہنا تھا کہ عوام کی صحت کے ساتھ کھیلنے والوں کے خلاف کارروائیاں بلا تفریق جاری رہیں گی۔ انہوں نے مزید کہا کہ جو لوگ بیمار اور لاغر گوشت عوام کو بیچنے کی کوشش کریں گے، ان کے خلاف سخت قانونی کارروائی کی جائے گی۔
