ڈی آئی خان: وائس چانسلر گومل یونیورسٹی پر حملہ، گورنر خیبرپختونخوا نے رپورٹ طلب کر لی

ڈی آئی خان میں وائس چانسلر گومل یونیورسٹی پروفیسر ڈاکٹر شکیب اللہ اور ان کے عملے پر حملہ کیا گیا ہے۔ حملے میں وائس چانسلر اور ان کا عملہ محفوظ رہا۔ واقعہ کے بعد، گورنر خیبرپختونخوا فیصل کریم کنڈی نے وائس چانسلر پر حملے کی رپورٹ طلب کر لی ہے۔گورنر خیبرپختونخوا فیصل کریم کنڈی نے وائس چانسلر ڈاکٹر شکیب اللہ پر فائرنگ کے واقعے پر تشویش کا اظہار کیا ہے۔ انہوں نے کہا کہ گومل یونیورسٹی، زرعی یونیورسٹی، اور لکی مروت یونیورسٹی کے قائم مقام وائس چانسلر پر حملہ افسوسناک ہے۔ فیصل کریم کنڈی نے مزید کہا کہ حملے میں وائس چانسلر اور ان کے ساتھیوں کے محفوظ رہنے پر اللہ کا شکر گزار ہیں۔ انہوں نے اس واقعے پر صوبائی حکومت کی کارکردگی پر بھی سوال اٹھایا، کہ صوبے میں امن و امان کی صورتحال اور قانون کی عملداری کی کمی دکھائی دے رہی ہے۔