روس کے اچھے تعلقات سب کیلئے فائدہ مند ہیں: سعودی وزیر خارجہ

ریاض:سعودی وزیر خارجہ شہزادہ فیصل بن فرحان کا کہنا ہےکہ روس کے ساتھ سعودی عرب کے اچھے تعلقات سب کے لیے فائدہ مند ہیں۔

ریاض میں میونخ سکیورٹی کانفرنس میں مشرق وسطیٰ کے ممالک کے کردار کے بارے میں مذاکراتی سیشن میں سعودی وزیرخارجہ نےکہا کہ تیل کی عالمی منڈیوں میں استحکام کے لیے ریاض سنجیدگی سے کام کر رہا ہے۔

شہزادہ فیصل بن فرحان کا کہنا تھا کہ امریکا کے ساتھ تعلقات میں قومی مفادات کو مدنظر رکھتے ہیں، ریاض کے واشنگٹن کے ساتھ بعض امور میں اختلافات ہیں جو پوشیدہ نہیں۔انہوں نےکہا کہ خطے میں سلامتی اور استحکام کے لیے امریکا کے ساتھ مل کرکام کر رہے ہیں، خلیج تعاون کونسل یوکرینی بحران کا مذاکرات سے حل چاہتی ہے۔

ایران سے جوہری معاہدے کے حوالے سے سعودی وزیرخارجہ نے کہا کہ ہم چاہتے ہیں کہ خلیجی ریاستیں اس ضمن میں بات کریں۔ انھوں نے مزید کہاکہ’’ہم جوہری معاہدے کی طرف واپس جانا چاہتے ہیں، لیکن ایک جامع نقطہ نظر اورخلیجی شراکت کے ساتھ”۔ان کا کہنا تھا کہ ’’حریف ملک کی طرف سے جوہری ہتھیاروں کا حصول ہرکسی کو اپنے آپشنز تلاش کرنے پر مجبور کرتا ہے‘‘۔

شہزادہ فیصل نے مزید کہا کہ سعودی عرب مشرق اوسط کوجوہری ہتھیاروں سے پاک کرنے کی حمایت کرتا ہے۔

سعودی وزیرخارجہ نے جمعہ کے روز میونخ میں اپنی جرمن ہم منصب انالینا بیئربوک اور فلسطینی وزیراعظم محمد اشتیہ سے ملاقات کی تھی۔ بیئربوک کے ساتھ شہزادہ فیصل نے گفتگو میں دونوں ممالک کے درمیان سیاسی، اقتصادی اور سکیورٹی کے شعبوں میں تعلقات کومضبوط بنانے اورعلاقائی ترقی کے طریقوں پر تبادلہ خیال کیا تھا۔