پاکستان مسلم لیگ (ن) اور تحریک انصاف کے رہنماؤں نے ملک میں غیرت کے نام پر قتل جیسے سنگین مسئلے پر آل پارٹیز کانفرنس بلانے پر اتفاق کرلیا ہے، تاکہ قومی سطح پر مؤثر لائحہ عمل طے کیا جا سکے۔
نجی ٹی وی کے ایک پروگرام میں گفتگو کرتے ہوئے وزیر مملکت شذرہ منصب علی نے کہا کہ ملک میں غیرت کے نام پر قتل سے متعلق قوانین موجود ہیں، لیکن اس مسئلے کے حل کے لیے سیاسی جماعتوں کو اکٹھا ہونا ہوگا۔ انہوں نے تجویز دی کہ ایک آل پارٹیز کانفرنس بلائی جائے تاکہ اس معاملے کو سنجیدگی سے زیر بحث لایا جا سکے۔پاکستان تحریک انصاف کے رہنما عامر ڈوگر نے بھی اس موقف کی تائید کرتے ہوئے کہا کہ یہ ایک سنجیدہ مسئلہ ہے جس پر تمام سیاسی جماعتوں کو مل بیٹھ کر مشترکہ موقف اپنانا چاہیے۔
تحریک تحفظ آئین پاکستان کے سینئر نائب صدر مصطفیٰ نواز کھوکھر نے بتایا کہ آل پارٹیز کانفرنس میں غیرت کے نام پر قتل کے خلاف قرار داد منظور کی جائے گی۔اس موقع پر اسلامی نظریاتی کونسل کے چیئرمین راغب نعیمی نے بھی اپنا موقف دیتے ہوئے کہا کہ اسلام غیرت کے نام پر قتل کی اجازت نہیں دیتا، اور ایسے واقعات اسلام کی روح کے منافی ہیں۔
سیاسی اور مذہبی رہنماؤں کے اس متفقہ موقف کو ملک بھر میں انسانی حقوق کے لیے مثبت پیش رفت قرار دیا جا رہا ہے۔
پاک امریکا ٹریڈ ڈائیلاگ: وزیر خزانہ امریکا روانہ
ملکی و عالمی مارکیٹ میں سونے کی قیمت میں معمولی کمی
سوات: مدرسے میں کمسن طالبعلم پر تشدد کے مرکزی ملزمان گرفتار
