گورنر پنجاب سردار سلیم حیدر نے لاہور میں ایک اہم فیصلہ کرتے ہوئے گورنر ہاؤس میں اسرائیلی برانڈز، غیر ملکی مشروبات اور مصنوعات کے استعمال پر مکمل پابندی عائد کر دی۔ ان کا کہنا تھا کہ جب تک وہ گورنر رہیں گے، گورنر ہاؤس میں ایسی تمام اشیاء کا استعمال ممنوع ہوگا جن سے اسرائیل یا کسی بھی غیر مسلم ملک کو مالی فائدہ پہنچتا ہو۔
گورنر پنجاب سے لاہور میں مختلف سیاسی رہنماؤں نے ملاقات کی، جن میں راجہ پرویز اشرف، علی گیلانی، چوہدری منظور اور دیگر اہم شخصیات شامل تھیں۔ اس ملاقات میں گورنر پنجاب نے اسرائیل کے خلاف اپنے موقف کو مزید واضح کیا اور کہا کہ غزہ کے نہتے مسلمانوں پر ظلم کا منظر دیکھ کر دل خون کے آنسو روتا ہے۔سردار سلیم حیدر نے کہا کہ "ہمیں ایسی تمام مصنوعات کا بائیکاٹ کرنا ہوگا جو اسرائیل اور دیگر غیر مسلم ممالک کی معیشت کو فروغ دیتی ہیں۔” انہوں نے اس عزم کا اظہار کیا کہ گورنر ہاؤس میں اسرائیلی برانڈز اور غیر ملکی مشروبات کے استعمال پر پابندی جاری رکھی جائے گی، تاکہ ان ممالک کے مالی فائدے کو روکنے میں اپنا کردار ادا کیا جا سکے۔
گورنر پنجاب نے ایران میں دہشت گردی کے نتیجے میں جان کی بازی ہارنے والے پاکستانیوں کے خاندانوں سے اظہار تعزیت بھی کیا۔ انہوں نے ایرانی حکومت سے مطالبہ کیا کہ وہ دہشت گردی میں ملوث افراد کو قرار واقعی سزا دے اور پاکستانی عوام کے جان و مال کا تحفظ یقینی بنائے۔
یہ فیصلہ گورنر پنجاب کے اسرائیل اور دیگر غیر مسلم ممالک کے ساتھ اقتصادی تعلقات کے بائیکاٹ کے عزم کو مزید مستحکم کرتا ہے، جس کا مقصد دنیا بھر میں مسلمانوں کی حمایت اور ان کے حقوق کا دفاع کرنا ہے۔
