لاہور:وزیراعلیٰ کو ڈی نوٹیفائی کرنیکا ڈیکلریشن جاری ہوسکتا ہے ، اس حوالے سے وزیر داخلہ رانا ثناء اللہ نے ایک بار پھر دعویٰ کیا ہے کہ گورنر پنجاب آج رات ڈی نوٹیفائی کیلئے ڈیکلریشن جاری کریں گے، لیٹر ایشو ہوتے ہی پرویزالہٰی وزیراعلیٰ نہیں رہیں گے، یہ خبر ہے کہ وزیراعلیٰ استعفیٰ دیدیں گے۔
نجی ٹی وی سے گفتگو کرتے ہوئے رانا ثناء اللہ نے کہا کہ گورنر پنجاب نے اسپیکر پنجاب اسمبلی کی رولنگ کا جواب دے دیا ہے، سبطین خان کو ان کی غلطی کی اصلاح کیلئے دیا گیا ٹائم گزر گیا۔ان کا کہنا ہے کہ گورنر پنجاب بلیغ الرحمان کو اب اپنی رائے کا اظہار کرنا ہوگا۔ ساتھ ہی دعویٰ کیا کہ آج رات تک گورنر پنجاب وزیراعلیٰ کو ڈی نوٹیفائی کرنے کیلئے ڈکلیئریشن جاری کریں گے، لیٹر ایشو ہوتے ہی پرویزالہٰی وزیراعلیٰ پنجاب نہیں رہیں گے۔
وزیر داخلہ کا یہ بھی کہنا ہے کہ خبر ہے ہوسکتا ہے وزیراعلیٰ پنجاب چوہدری پرویز الٰہی استعفیٰ دے دیں، پرویز الٰہی کی پوزیشن بدلتی رہتی ہے۔انہوں نے کہا کہ پی ٹی آئی کے گورنر ہاؤس پر احتجاج میں 500 سے 700 آدمی تھے، میں نے وزیراعلیٰ ہاؤس سیل کرنے کی بات نہیں کی تھی۔
یاد رہےکہ اس سے پہلے کہا جارہا تھا کہ گورنر ہاؤس میں جاری اجلاس میں اہم پیش رفت، وفاقی وزارت قانون سمیت لیگل ٹیم نے گورنر کو وزیراعلیٰ کو ڈی نوٹیفائی نہ کرنے کی تجویز دیدی۔ذرائع کے مطابق وزیراعظم شہبازشریف نے بھی گورنر پنجاب کو وزیراعلیٰ کو ڈی نوٹیفائی کرنے سے فی الحال روک دیا ہے، وزیراعظم شہبازشریف نے گورنر کو لیگل ٹیم سے مزید مشورہ کرنے کی ہدایات کر دیں۔
لیگل ٹیم نے تجویز دی کہ وزیراعلیٰ کی جانب سے اعتماد کا ووٹ لینے سے انکار نہیں کیا تو کیسے ڈی نوٹیفائی کرسکتے ہیں، گورنر ہاؤس میں قانونی اور آئینی معاملات پر مشاورت جاری ہے۔