گوجرخان ،باغی ٹی وی(نامہ نگارساجدقیوم)پٹرولنگ پولیس راولپنڈی ریجن نے ایس ایس پی محمد بن اشرف کی ہدایات پر جرائم پیشہ عناصر کے خلاف ایک بڑی کارروائی کرتے ہوئے 14 سال سے مفرور 302 قتل کے اشتہاری مجرم کو گرفتار کر لیا۔
تفصیلات کے مطابق ڈی ایس پی پٹرولنگ ضلع جہلم سید ذوالفقار گیلانی کی نگرانی میں پٹرولنگ پوسٹ چک میوں کے اسسٹنٹ سب انسپکٹر ناصر جہانگیر اور ان کی ٹیم نے تھانہ گوجرخان راولپنڈی کے درج مقدمہ قتل کے اشتہاری مجرم ارشد محمود ولد محمد بشیر سکنہ گوجرخان کو گرفتار کر کے سلاخوں کے پیچھے دھکیل دیا۔
ملزم ارشد محمود 14 سال قبل قتل کے ایک مقدمے میں نامزد تھا اور اس وقت سے فرار تھا۔ پٹرولنگ پولیس راولپنڈی ریجن کے ایس ایس پی محمد بن اشرف نے اس کامیابی پر پولیس ٹیم کو شاباش دی اور جرائم پیشہ عناصر کے خلاف کارروائیاں جاری رکھنے کا عزم ظاہر کیا۔
انہوں نے کہا کہ پٹرولنگ پولیس جرائم کی روک تھام اور سرکوبی کے لیے ہمہ وقت کوشاں ہے۔ انہوں نے عوام سے بھی اپیل کی کہ وہ جرائم پیشہ عناصر کی نشاندہی میں پولیس کے ساتھ تعاون کریں۔
