گوجرہ : مسائل کے حل کے لیے میٹنگ، شہر کو ماڈل سٹی بنانے کا عزم
گوجرہ، باغی ٹی وی(نامہ نگار عبد الرحمن جٹ)سابق ایم این اے اور وفاقی پارلیمانی سیکرٹری برائے پلاننگ اینڈ ڈیویلپمنٹ چوہدری خالد جاوید وڑائچ اور ممکنہ ایم پی اے چوہدری عقبہ علی وڑائچ نے میونسپل کمیٹی گوجرہ کا دورہ کیا۔ وہاں انہوں نے اسسٹنٹ کمشنر گوجرہ کامران اشرف اور سی او بلدیہ سمیت دیگر افسران کے ساتھ اہم میٹنگ کی۔
میٹنگ میں اسسٹنٹ کمشنر نے شہر کو درپیش مسائل پر تفصیلی بریفنگ دی اور کہا کہ گوجرہ کے شہریوں کو سہولیات کی فراہمی کے لیے حکومت اور مقامی انتظامیہ کے تعاون کی اشد ضرورت ہے۔ انہوں نے چوہدری خالد جاوید وڑائچ سے ان مسائل کے حل کے لیے مدد کی درخواست کی۔
چوہدری خالد جاوید وڑائچ نے ہر ممکن تعاون کی یقین دہانی کرواتے ہوئے کہا کہ گوجرہ کو ایک خوبصورت اور ماڈل شہر بنانا ان کی اولین ترجیح ہے۔ انہوں نے کہا، "جہاں بھی میری ضرورت پڑی، میں حاضر ہوں۔ ہم سب مل کر اس شہر کو ایک مثالی مقام بنائیں گے، اور جلد ہی اس کام میں کامیابی حاصل کریں گے۔”
یہ میٹنگ گوجرہ کی ترقی اور عوامی مسائل کے حل کے لیے اہم قدم ثابت ہو سکتی ہے۔
