گوجرہ:مبینہ پولیس مقابلے میں ایک ڈاکو ہلاک
گوجرہ (باغی ٹی وی، نامہ نگار عبدالرحمان جٹ)ڈاکوؤں کی راہگیر کو لوٹنے کی کوشش ناکام، پولیس مقابلے میں ایک ڈاکو ہلاک
تفصیلات کے مطابق گوجرہ میں ڈاکوؤں کی راہگیر کو لوٹنے کی کوشش پولیس کی بروقت کارروائی سے ناکام بنا دی گئی۔ پولیس اور ڈاکوؤں کے درمیان مبینہ مقابلے کے دوران ساتھیوں کی فائرنگ سے ایک ڈاکو ہلاک ہوگیا جبکہ دو ڈاکو فائرنگ کرتے ہوئے فرار ہونے میں کامیاب ہو گئے۔
تھانہ صدر گوجرہ کے علاقہ چک نمبر 354 ج ب کے قریب تین نامعلوم ڈاکوؤں نے سڑک پر ناکہ لگا کر راہگیروں کو لوٹنے کی کوشش کی۔ اطلاع ملتے ہی تھانہ صدر پولیس گوجرہ موقع پر پہنچ گئی۔ ڈاکوؤں نے پولیس کو دیکھتے ہی اندھا دھند فائرنگ شروع کر دی، جس کے جواب میں پولیس نے بھی حفاظت خود اختیاری کے تحت فائرنگ کی۔
فائرنگ رکنے کے بعد سرچ آپریشن کے دوران ایک ڈاکو مردہ حالت میں پایا گیا جبکہ اس کے دو ساتھی فرار ہونے میں کامیاب ہو گئے۔ پولیس نے ہلاک ہونے والے ڈاکو کی نعش تحویل میں لے کر تحصیل ہیڈ کوارٹرز ہسپتال منتقل کر دی اور فرار ہونے والے ڈاکوؤں کی تلاش شروع کر دی ہے۔
