گوجرانوالہ (باغی ٹی وی، نامہ نگار محمد رمضان نوشاہی): تھانہ گرجاکھ پولیس نے منشیات فروشی کے دھندے میں ملوث 2 ملزمان کو گرفتار کر لیا، جن کے قبضے سے 24 کلو 350 گرام چرس اور 3 ہزار 600 روپے کی رقم برآمد کی گئی۔
ایس پی سٹی شاہد رشید کی ہدایت پر ایس ایچ او تھانہ گرجاکھ سب انسپکٹر محمود الحسن کی قیادت میں پولیس ٹیم نے دوران گشت و ناکہ بندی کے دوران منشیات فروشی میں ملوث ملزمان سفید خان اور محمد آصف کو گرفتار کیا۔ ملزمان نے دوران تفتیش انکشاف کیا کہ وہ ضلع بھر میں نوجوانوں کو منشیات فراہم کرتے تھے۔
سٹی پولیس آفیسر محمد ایاز سلیم نے منشیات فروشوں کے خلاف سخت کارروائیاں کرنے کی ہدایت دیتے ہوئے کہا کہ نوجوان نسل کے محفوظ مستقبل کے لیے منشیات فروشوں کا قلع قمع کرنا ضروری ہے۔ اس موقع پر سماجی اور سیاسی تنظیموں اور علاقے کے مکینوں نے پولیس کی کارروائی کو سراہا اور انہیں خراج تحسین پیش کیا۔
سی پی او محمد ایاز سلیم نے ایس ایچ او سب انسپکٹر محمود الحسن اور ان کی ٹیم کو اعلیٰ کارکردگی دکھانے پر شاباش دی۔
