گوجرانوالہ (باغی ٹی وی، نامہ نگار محمد رمضان نوشاہی) گوجرانوالہ میں ڈاکوؤں کی فائرنگ سے دو پولیس اہلکار شدید زخمی ہوگئے، جن کی حالت تشویشناک ہے۔ یہ دونوں واقعات شہر کے مختلف علاقوں میں پیش آئے۔
پولیس حکام کے مطابق پہلا واقعہ چن دا قلعہ کے قریب پیش آیا، جہاں ڈاکوؤں نے پولیس پر فائرنگ کر دی۔ اس حملے میں پولیس اہلکار زمان زخمی ہوگئے۔ دوسرے واقعے میں باغبانپورہ کے علاقے میں ڈاکوؤں نے پولیس اہلکار کانسٹیبل نعیم پر فائرنگ کی، جس کے نتیجے میں وہ بھی شدید زخمی ہوگئے۔
پولیس حکام نے بتایا کہ دونوں اہلکاروں کو فوری طور پر ہسپتال منتقل کیا گیا جہاں ان کی حالت تشویشناک ہے۔ ڈاکو حملے کے بعد موقع سے فرار ہونے میں کامیاب ہوگئے۔ پولیس نے فوراً ضلع بھر میں ناکہ بندی کر دی ہے اور ان ملزمان کی گرفتاری کے لیے مختلف علاقوں میں چھاپے مارے جا رہے ہیں۔
پولیس ذرائع کا کہنا ہے کہ ملزمان کو جلد گرفتار کر لیا جائے گا اور ان کی شناخت کے لیے تفتیش جاری ہے۔
