ممتاز حیدر
گوجرانوالہ – تھانہ تتلے عالی کے نواحی علاقے اڑتالی ورکاں میں پیش آنے والے افسوسناک واقعے نے پورے علاقے کو سوگوار کر دیا۔ فائرنگ کے ایک خونی واقعے میں پانچ افراد جاں بحق جبکہ ایک شخص شدید زخمی ہو گیا۔ واقعے کے فوراً بعد پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر تفتیش کا آغاز کر دیا گیا ہے۔
پولیس کے مطابق تین افراد موقع پر ہی جاں بحق ہو گئے، جبکہ دو زخمیوں نے ہسپتال میں دم توڑ دیا۔ جاں بحق افراد کی شناخت عمر، بلا، عثمان اور دیگر کے نام سے ہوئی ہے۔ زخمی شخص کی حالت تشویشناک بتائی جا رہی ہے اور وہ اسپتال میں زیرِ علاج ہے۔ابتدائی تحقیقات سے معلوم ہوا ہے کہ یہ واقعہ دیرینہ دشمنی اور سابقہ رنجش کا نتیجہ ہے۔ پولیس کے مطابق ملزم عمران نذیر ورک نے ذاتی دشمنی کی بنیاد پر فائرنگ کی اور پانچ افراد کو نشانہ بنایا۔ ذرائع کے مطابق مقتولین اور ملزم کے درمیان کافی عرصے سے دشمنی چلی آ رہی تھی، جس کا انجام یہ خونی واقعہ بنا۔
جاں بحق افراد کی لاشوں کو پوسٹ مارٹم کے لیے اسپتال منتقل کر دیا گیا ہے۔ پولیس نے جائے وقوعہ سے شواہد اکٹھے کر لیے ہیں اور تفتیش کا دائرہ کار وسیع کر دیا گیا ہے۔ پولیس کا کہنا ہے کہ ملزم کی گرفتاری کے لیے چھاپے مارے جا رہے ہیں اور جلد اسے گرفتار کر کے قانون کے کٹہرے میں لایا جائے گا۔
