ڈاکٹرغلام مصطفی بڈانی
گوجرانوالہ (باغی ٹی وی نامہ نگارمحمدرمضان نوشاہی) سیشن کورٹ میں فائرنگ کر کے دو افراد کو قتل کرنے والا ملزم اذان مبینہ پولیس مقابلے میں ہلاک ہو گیا۔ پولیس کے مطابق تھانہ لدھے والا وڑائچ کے علاقے میں سی سی ڈی ٹیم اور ملزم کے درمیان دو طرفہ فائرنگ کا تبادلہ ہوا، جس میں ملزم اپنے ہی ساتھیوں کی فائرنگ سے مارا گیا، جبکہ اس کے دونوں ساتھی اندھیرے کا فائدہ اٹھاتے ہوئے فرار ہونے میں کامیاب ہو گئے۔
اس سے قبل سول لائن پولیس ملزم اذان کو اس کے ساتھیوں کی گرفتاری کیلئے لے جا رہی تھی کہ ملزم کے ساتھیوں نے پولیس کی گاڑی پر حملہ کر دیا اور فائرنگ کر کے اسے چھڑا کر فرار ہو گئے۔ کچھ دیر بعد پولیس اور فرار ہونے والے افراد کا لدھے والا وڑائچ میں آمنا سامنا ہوا جہاں مبینہ مقابلہ ہوا۔
پولیس کا کہنا ہے کہ ملزم اذان نے تین روز قبل گوجرانوالہ سیشن کورٹ کے کمرہ عدالت میں فائرنگ کر کے دو افراد کو قتل اور دو کو زخمی کر دیا تھا۔ پولیس نے ملزم کے فرار ساتھیوں کی گرفتاری کے لیے مختلف مقامات پر چھاپے مارنے کا آغاز کر دیا ہے۔
