حافظ آباد،باغی ٹی وی (خبر نگارشمائلہ) ضلعی انتظامیہ کی مبینہ ملی بھگت سے حافظ آباد میں مرغی مافیا بے لگام ہو گیا ہے۔ رمضان المبارک میں مرغی کے گوشت کی قیمتوں میں خود ساختہ اضافہ کر دیا گیا ہے۔ ونیکے روڈ اور شہر بھر میں مرغی کا گوشت 725 روپے فی کلو فروخت ہو رہا ہے، جبکہ سرکاری ریٹ 595 روپے فی کلو مقرر ہے۔
عوام کا کہنا ہے کہ پرائس کنٹرول مجسٹریٹ اپنے دفاتر تک محدود ہو کر رہ گئے ہیں۔ دکانداروں نے 1000 گرام گوشت کی بجائے 900 گرام گوشت فروخت کرنا شروع کر دیا ہے اور گاہکوں سے سرکاری ریٹ سے زائد رقم وصول کی جا رہی ہے۔ رمضان میں بنیادی ضروریات کی اشیاء، جیسے گوشت اور انڈوں کی قیمتوں میں اضافہ ایک سوچی سمجھی سازش معلوم ہوتی ہے۔
عوام نے ضلع انتظامیہ اور پرائس کنٹرول مجسٹریٹ سے مطالبہ کیا ہے کہ وہ مرغی مافیا کے خلاف فوری کارروائی کریں اور سرکاری ریٹ پر گوشت کی فراہمی کو یقینی بنائیں۔ انہوں نے کہا کہ رمضان المبارک میں غریب اور متوسط طبقہ مہنگائی کی چکی میں پس رہا ہے، اور انتظامیہ کو اس صورتحال کا فوری نوٹس لینا چاہیے۔
