حسن نصر اللہ کی شہادت پر حافظ نعیم الرحمان کا اظہارِ تعزیت

کراچی: امیر جماعت اسلامی کراچی حافظ نعیم الرحمان نے حزب اللہ کے سربراہ حسن نصر اللہ کی شہادت پر گہرے دکھ اور افسوس کا اظہار کرتے ہوئے کہا ہے کہ انہوں نے اپنی زندگی ناجائز اسرائیلی ریاست کے خلاف مزاحمت میں گزاری اور عظیم مقصد کی خاطر اپنی جان کا نذرانہ پیش کیا۔ حافظ نعیم الرحمان نے اپنے بیان میں کہا کہ حسن نصر اللہ نے ساری زندگی لبنان کے دفاع اور اسرائیل کی جارحیت کے خلاف جدوجہد میں صرف کی۔ ان کی قربانی کو رہتی دنیا تک یاد رکھا جائے گا اور ان شاء اللہ، حزب اللہ اسرائیل کے خلاف مزاحمت جاری رکھے گی۔ امیر جماعت اسلامی نے کہا کہ اللہ تعالیٰ حسن نصر اللہ کی شہادت کو قبول فرمائے اور ان کے درجات بلند کرے۔انہوں نے مزید کہا کہ اقوام متحدہ جیسے اداروں کی بے بسی اور ناکامی اس وقت کھل کر سامنے آ گئی ہے جب لبنان اور غزہ پر اسرائیلی حملے ہوئے اور عالمی ادارہ کوئی ٹھوس اقدام اٹھانے میں ناکام رہا۔ حافظ نعیم الرحمان کا کہنا تھا کہ اقوام متحدہ عملی طور پر عالمی طاقتوں کے مفادات کے تحفظ کے لیے کام کرنے والی ایک ناکارہ تنظیم بن چکی ہے، جو مظلوموں کو انصاف دلانے میں مکمل طور پر ناکام ہے۔
حافظ نعیم نے مسلم دنیا کے حکمرانوں اور افواج سے مطالبہ کیا کہ وہ اپنے موقف پر غور کریں کہ وہ اس وقت کہاں کھڑے ہیں اور کس کا ساتھ دے رہے ہیں؟ انہوں نے کہا کہ امت مسلمہ کو اس بات کا ادراک ہونا چاہیے کہ اسرائیل کے خلاف مزاحمت وقت کی اہم ترین ضرورت ہے اور مسلم ممالک کو اس حوالے سے ایک جامع حکمت عملی اپنانی ہوگی۔امیر جماعت اسلامی کے اس بیان نے مسلم دنیا میں ایک نئی بحث کو جنم دیا ہے، جہاں عوام اور مختلف سیاسی حلقے اقوام متحدہ کی بے عملی پر تنقید کر رہے ہیں اور مسلم ممالک کی افواج اور حکمرانوں سے اسرائیل کے خلاف بھرپور اقدام کرنے کا مطالبہ کر رہے ہیں۔