حافظ آباد،باغی ٹی وی (خبر نگارشمائلہ)وزیر اعلیٰ پنجاب مریم نواز شریف کے ویژن اور آئی جی پنجاب ڈاکٹر عثمان انور کے احکامات پر عمل پیرا ہوتے ہوئے، ڈی پی او حافظ آباد عاطف نذیر کی زیر نگرانی تھانہ کسوکی پولیس نے علاقے میں کامیاب سرچ آپریشن کیا۔ اس دوران قتل کے مقدمے میں ملوث دو اشتہاری ملزمان اور منشیات فروشی میں ملوث دو بدنام زمانہ ملزمان کو گرفتار کر لیا گیا۔
تفصیلات کے مطابق تھانہ کسوکی پولیس نے مقدمہ نمبر 334/23 جرم 302/324/109/ت پ میں مطلوب ملزمان بلال غوث اور جواد غوث کو گرفتار کیا۔ یہ دونوں ملزمان کافی عرصے سے قتل کے مقدمے میں اشتہاری تھے۔ ڈی پی او عاطف نذیر نے ڈی ایس پی صدر سرکل رانا جمیل قیصر اور ایس ایچ او کسوکی مشتاق نون کی سربراہی میں ایک خصوصی ٹیم تشکیل دی، جس نے چند ہی دنوں میں مطلوبہ ملزمان کو گرفتار کر لیا۔
اس کے علاوہ ایس ایچ او مشتاق نون نے منشیات فروشوں کے خلاف بھی موثر کارروائی کرتے ہوئے دو بدنام زمانہ ملزمان زہیب ولد اللہ رکھا سے 1200 گرام چرس اور عمر فاروق ولد محمد سلیم سے 1420 گرام چرس برآمد کی۔ دونوں ملزمان کے خلاف الگ الگ مقدمات درج کر کے قانونی کارروائی کا آغاز کر دیا گیا ہے۔
ایس ایچ او تھانہ کسوکی مشتاق نون نے میڈیا سے گفتگو کرتے ہوئے کہا کہ ڈی پی او عاطف نذیر اور ڈی ایس پی صدر سرکل رانا جمیل قیصر کی قیادت میں اشتہاری ملزمان اور منشیات فروشوں کے خلاف کارروائیاں جاری رہیں گی۔ انہوں نے کہا کہ منشیات فروش کسی بھی رعایت کے مستحق نہیں ہیں، کیونکہ یہ ہماری نسلوں کو تباہ کر رہے ہیں۔ انہوں نے مزید کہا کہ ان کے خلاف بلا تفریق کارروائیاں جاری رہیں گی۔
اہلیان حافظ آباد نے منشیات فروشوں کے خلاف کارروائیوں پر ایس ایچ او تھانہ کسوکی مشتاق نون اور ان کی ٹیم کو خراج تحسین پیش کیا اور امید ظاہر کی کہ تھانہ کسوکی پولیس جرائم کے خاتمے، خصوصاً اشتہاری ملزمان اور منشیات فروشوں کے خلاف کارروائیاں جاری رکھے گی۔
ڈی پی او عاطف نذیر نے ڈی ایس پی صدر سرکل رانا جمیل قیصر اور ایس ایچ او کسوکی مشتاق نون کی اشتہاری ملزمان اور منشیات فروشوں کے خلاف کارروائیوں کو سراہا اور انہیں مزید تیز کرنے کی ہدایت کی۔
