حافظ آباد،باغی ٹی وی (خبرنگارشمائلہ) انسداد پولیو مہم کا آغاز، 2 لاکھ 38 ہزار بچوں کو قطرے پلانے کا ہدف
ضلع بھر میں آج سے پانچ روزہ انسداد پولیو مہم کا آغاز ہوگیا۔ ڈپٹی کمشنر عبدالرزاق نے جھگیوں میں رہنے والے بچوں کو حفاظتی قطرے پلا کر مہم کا افتتاح کیا۔
انسداد پولیو مہم 3 فروری سے 7 فروری تک جاری رہے گی، جس دوران پانچ سال تک کی عمر کے 2 لاکھ 38 ہزار 551 بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
ڈپٹی کمشنر کے مطابق محکمہ صحت نے 998 ٹیمیں تشکیل دی ہیں جو بس اڈوں، ریلوے اسٹیشنز، بازاروں، عوامی مقامات، اسکولوں اور گھر گھر جا کر بچوں کو قطرے پلائیں گی۔
ڈپٹی کمشنر نے والدین سے اپیل کی کہ وہ اپنے بچوں کو پولیو جیسی خطرناک بیماری سے بچانے کے لیے حفاظتی قطرے لازمی پلائیں اور کسی بچے کو قطرے پینے سے محروم نہ رہنے دیں۔ علمائے کرام، تاجروں، اساتذہ، اور میڈیا نمائندگان سے بھی تعاون کی درخواست کی گئی ہے تاکہ مہم کو کامیاب بنایا جاسکے۔
