ڈاکٹرغلام مصطفی بڈانی
حافظ آباد(باغی ٹی وی رپورٹ) مسلح افراد کی خاتون سے شوہر کے سامنے اجتماعی زیادتی، ویڈیو وائرل ہونے پر مقدمہ درج
حافظ آباد میں انسانیت سوز واقعہ منظر عام پر آیا ہے جہاں ایک ماہ قبل مسلح افراد نے ایک خاتون کو اُس کے شوہر کے سامنے اجتماعی زیادتی کا نشانہ بنایا، جبکہ اس واقعے کی ویڈیو بھی سوشل میڈیا پر وائرل ہوگئی۔
واقعے کے بعد پولیس نے متاثرہ خاتون کے شوہر کی مدعیت میں چار نامزد سمیت آٹھ ملزمان کے خلاف اجتماعی زیادتی کا مقدمہ درج کر لیا ہے۔ مقدمے کے مدعی کے مطابق واقعے کے فوری بعد پولیس کو شکایت کی گئی تھی لیکن مقدمہ درج کرنے میں مسلسل ٹال مٹول سے کام لیا گیا۔ مدعی نے الزام عائد کیا کہ جب وہ ڈی پی او آفس شکایت لے کر جاتے تو وہاں تعینات ایک ملزم کے رشتہ دار انہیں دھمکا کر واپس بھیج دیتے تھے۔
سوشل میڈیا پر نازیبا ویڈیو کے وائرل ہونے کے بعد ڈی پی او حافظ آباد نے نوٹس لیتے ہوئے مقدمہ درج کرنے کا حکم دیا۔ پولیس حکام کا کہنا ہے کہ واقعے میں ملوث ملزمان کی گرفتاری کے لیے چھاپے مارے جا رہے ہیں اور جلد انہیں قانون کے کٹہرے میں لایا جائے گا۔
عوامی حلقوں نے اس واقعے پر شدید غم و غصے کا اظہار کرتے ہوئے اعلیٰ حکام سے فوری اور سخت کارروائی کا مطالبہ کیا ہے۔
