حافظ آباد: اساتذہ کے حقوق کے تحفظ کے لیے اتحاد ناگزیر، عملی تحریک کا آغاز

حافظ آباد،باغی ٹی وی (خبرنگار) ینگ ٹیچرز ایسوسی ایشن ضلع حافظ آباد کی قیادت کا اجلاس صدر ینگ ٹیچرز ایسوسی ایشن پنجاب ڈاکٹر ضمیر الحسن کی صدارت میں منعقد ہوا، جس کی میزبانی چیئرمین متحدہ محاذ اساتذہ چوہدری اقبال ہنجرا نے کی۔ اجلاس میں سابق رہنما پنجاب ٹیچرز یونین مہر حبیب اللہ، محمد مالک طاہر ہنجرا اور فخر پنجاب منیر خان شنو نے خصوصی شرکت کی۔

اجلاس سے خطاب کرتے ہوئے ڈاکٹر ضمیر الحسن نے اساتذہ کے مسائل کا ذمہ دار نااہل اور غیر مخلص قیادت کو قرار دیتے ہوئے کہا کہ اساتذہ کے مفادات کو ہمیشہ ذاتی مفادات پر قربان کیا گیا ہے۔ مہر حبیب اللہ نے اساتذہ کے اتحاد کو وقت کی اہم ضرورت قرار دیتے ہوئے کہا کہ حقوق کے تحفظ کے لیے عملی جدوجہد کا آغاز کردیا گیا ہے اور ضلع حافظ آباد کی تمام تنظیمات کو متحد کیا جائے گا۔

دیگر مقررین، جن میں طاہر مالک، منیر خان شنو اور محسن اعجاز شامل تھے، نے بھی اتحاد پر زور دیتے ہوئے کہا کہ اساتذہ کی تقسیم محکمہ تعلیم کے زوال کا سبب بن رہی ہے، لہٰذا تمام تنظیمات کو فوری طور پر ایک پلیٹ فارم پر آنا ہوگا۔ اس مقصد کے تحت جلد مشترکہ اجلاس طلب کیا جائے گا۔