وفاقی حکومت کا منی بجٹ لانے کا اشارہ، وزیر مملکت برائے خزانہ کی تصدیق

اسلام آباد: وفاقی حکومت نے رواں مالی سال کے دوران منی بجٹ لانے کا امکان ظاہر کیا ہے۔ وزیر مملکت برائے امور خزانہ علی پرویز ملک نے مقامی ٹی وی سے گفتگو کرتے ہوئے کہا کہ اگر عالمی مالیاتی ادارے (آئی ایم ایف) کے اہداف پورے کرنے کے لیے ضرورت پیش آئی، تو منی بجٹ لانے کا فیصلہ کیا جا سکتا ہے۔انہوں نے مزید وضاحت کی کہ حکومت کی خواہش تو نہیں کہ عوام پر اضافی بوجھ ڈالا جائے، لیکن اگر مقرر کردہ اہداف اور مالیاتی اعداد و شمار پورے نہ ہوئے، تو حکومت کو منی بجٹ کی طرف جانا پڑ سکتا ہے۔ یہ بیان اس وقت آیا ہے جب آئی ایم ایف کی طرف سے پاکستان کو اپنی معاشی صورتحال بہتر بنانے کے لیے مزید اقدامات اٹھانے پر زور دیا جا رہا ہے۔یہ صورتحال اس بات کی نشاندہی کرتی ہے کہ حکومت کو ملکی مالیاتی استحکام برقرار رکھنے کے لیے سخت فیصلے کرنا پڑ سکتے ہیں۔ عوامی حلقوں میں اس بیان کے بعد بجٹ سے متعلق مزید چیلنجز اور مہنگائی کے خدشات پیدا ہو گئے ہیں۔