سعد فاروق
بھارتی وزیر خارجہ ایس جے شنکر کے اس انکشاف پر کہ پاکستان پر حملے سے قبل اسلام آباد کو مطلع کیا گیا تھا، بھارت میں سیاسی ہلچل مچ گئی ہے۔
باغی ٹی وی کے مطابق جے شنکر کے بیان نے تنازع کھڑا کر دیا ہے، جس میں انہوں نے تسلیم کیا کہ بھارتی حملوں سے قبل پاکستان کو باقاعدہ اطلاع دی گئی تھی۔ بھارت میں اپوزیشن جماعت کانگریس کے سینئر رہنما راہول گاندھی نے اس بیان پر شدید تنقید کرتے ہوئے اسے "سنگین سیکیورٹی معاملہ” قرار دیا ہے۔ ردعمل دیتے ہوئے راہول گاندھی نے کہا کہ اگر واقعی حملے سے قبل دشمن ملک کو آگاہ کیا گیا، تو یہ انتہائی تشویش ناک اور ملکی سلامتی کے لیے خطرناک عمل ہے۔ عوام کو بتایا جائے کہ ایسا کرنے کا اختیار کس نے دیا؟”
راہول گاندھی کا کہنا تھا کہ مودی حکومت کی یہ پالیسی ملک کی دفاعی خودمختاری کے خلاف ہے اور اس پر خاموشی نہیں برتی جا سکتی۔ انہوں نے مطالبہ کیا کہ حکومت واضح کرے کہ حملے کے بعد بھارتی فضائیہ کو کیا نقصان اٹھانا پڑا، اور کیا اس "اطلاع دینے” کے عمل کا اس نقصان سے کوئی تعلق ہے؟
پہلگام میں مبینہ فالس فلیگ آپریشن اور حالیہ بیانات کے بعد بھارتیہ جنتا پارٹی (بی جے پی) اور کانگریس کے درمیان سیاسی محاذ آرائی شدت اختیار کر گئی ہے۔ کانگریس رہنماؤں کا کہنا ہے کہ بی جے پی حب الوطنی کے دعوے کرتی ہے مگر حقیقت میں ایسی پالیسیاں اپنا رہی ہے جو قومی سلامتی کے لیے خطرہ بن سکتی ہیں۔
راہول گاندھی نے طنزیہ انداز میں کہا کہ جو لوگ کل تک مودی حکومت کے گُن گا رہے تھے، وہ آج کانگریس کی سوچ کو یاد کر رہے ہیں۔
واضح رہے کہ بھارتی میڈیا میں بھی جے شنکر کے بیان پر سوالات اٹھائے جا رہے ہیں، جبکہ بعض سیکیورٹی ماہرین اسے ایک سفارتی اور اسٹریٹجک غلطی قرار دے رہے ہیں۔
کراچی میں شدید گرمی کے دوران 14 گھنٹے تک کی لوڈشیڈنگ، شہری پریشان
امریکہ میں بم دھماکہ، ایک شخص ہلاک، واقعہ دہشت گردی قرار
اپووا اور ادیبوں کی افواج پاکستان سے یکجہتی.تحریر:طارق نوید سندھو
