لندن: برطانوی دارالحکومت لندن کا سب سے بڑا اور مصروف ہیتھرو ایئرپورٹ آج 21 مارچ کو مکمل طور پر بند رہنے کا اعلان کیا گیا ہے۔
ایئرپورٹ کے ترجمان کے مطابق، ایئرپورٹ کو بجلی فراہم کرنے والے سب اسٹیشن میں لگنے والی آگ کے باعث ایئرپورٹ کو بجلی کی فراہمی میں شدید خلل پڑا ہے، جس کی وجہ سے ایئرپورٹ کی تمام کارروائیاں روک دی گئی ہیں۔ایئرپورٹ حکام نے مسافروں سے اپیل کی ہے کہ وہ ایئرپورٹ نہ آئیں اور اپنی ایئر لائنز سے رابطہ کریں تاکہ وہ اپنی پروازوں کی صورتحال کے بارے میں آگاہ ہو سکیں۔ ہیتھرو ایئرپورٹ پر روزانہ تقریباً 1300 پروازیں آتی اور جاتی ہیں، جس کے نتیجے میں لاکھوں مسافروں کو اس بندش کی وجہ سے شدید پریشانی کا سامنا ہوگا۔
ہیتھرو ایئرپورٹ کے قریب مغربی لندن میں واقع ایک سب اسٹیشن میں لگی آگ نے نہ صرف ایئرپورٹ کی سرگرمیوں کو متاثر کیا ہے بلکہ ہزاروں گھروں کو بھی بجلی سے محروم کر دیا ہے۔ غیر ملکی میڈیا رپورٹس کے مطابق، لندن سب اسٹیشن کے قریب واقع 150 گھروں کو خالی کرانے کا حکم دیا گیا ہے۔ علاقے میں دھویں کے بادل پھیلنے کے باعث قریبی آبادی کو گھروں کی کھڑکیاں بند رکھنے کا مشورہ بھی دیا گیا ہے۔آگ پر قابو پانے کے لیے 10 فائر انجن اور 70 فائر فائٹرز کی ٹیمیں کام کر رہی ہیں۔ حکام کا کہنا ہے کہ آگ پر قابو پانے کی کوششیں جاری ہیں، اور امید کی جا رہی ہے کہ جلد ہی صورتحال بہتر ہو جائے گی۔ تاہم، ایئرپورٹ کی بندش کے باعث مسافروں کو غیر معمولی مشکلات کا سامنا ہوگا۔
یہ پہلا موقع نہیں جب ہیتھرو ایئرپورٹ میں آتشزدگی کا واقعہ پیش آیا ہو۔ اس سے قبل اگست 2022 میں بھی ایئرپورٹ کے قریب ایک آتشزدگی کا واقعہ رونما ہوا تھا، جس کے نتیجے میں ایئرپورٹ کی کارروائیوں میں خلل آیا تھا۔ہیتھرو ایئرپورٹ کے حکام نے مسافروں کو ہدایت کی ہے کہ وہ ایئرپورٹ نہ آئیں اور اپنی پروازوں کے حوالے سے ایئر لائنز سے رابطہ کریں۔
