میدانی علاقوں میں آج بھی شدید دھند،کئی مقامات پر موٹرویز بند

سندھ، پنجاب اور خیبرپختونخوا سمیت ملک کے میدانی علاقے آج بھی شدید دھند کی لپیٹ میں ہیں۔ شدید دھند کے باعث معمولات زندگی متاثر ہوگئے ہیں جبکہ حد نگاہ متاثر ہونے پر کئی مقامات سے موٹرویز کو ٹریفک کیلئے بند کردیا گیاہے۔

ترجمان موٹرویز پولیس کے مطابق شدید دھند کے باعث حد نگاہ متاثر ہونے سے موٹرویز ایم 1 کو پشاورٹول پلازہ سے برہان انٹرچینج تک، موٹرویز ایم 2 کو لاہور سے شیخوپورہ تک، اسلام آباد ٹول پلازہ سے بلکسر اور ہرن مینار سے ٹھوکر نیاز بیگ تک ٹریفک کیلئے بند کیا گیا ہے۔

موٹرویز ایم 3 کو لاہور سے سمندری اور فیض پور سے درخانہ تک جبکہ موٹرویز ایم 4 کو شیر شاہ سے عبدالحکیم تک ٹریفک کیلئے اور لاہور سیالکوٹ موٹرویز کو بھی بند کردیا گیا ہے۔

محکمہ موسمیات کے مطابق اتوار کے روز ملک کے بیشتر علاقوں میں موسم سرد اور خشک جبکہ شمالی علاقوں میں شدید سرد رہے گا۔ تاہم بلوچستان میں مطلع ابرآلود رہنے اور کہیں کہیں گرج چمک کے ساتھ بارش اورپہاڑوں پر برفباری کا امکان۔

اسلام آباد، پنجاب، بالائی سندھ اور خیبر پختونخواکے میدانی علاقوں میں شدید دھند چھائی رہے گی۔

گذشتہ 24 گھنٹے کا موسم ملک کےبیشتر علاقوں میں موسم سرد اور خشک جبکہ شمالی علاقوں میں شدید سرد رہا۔ پنجاب، بالائی سندھ اورخیبر پختونخوا کے میدانی علاقے شدید دھند کی لپیٹ میں رہے۔ تاہم لاڑکانہ میں 01 ملی میٹر بارش ریکارڈ ہوئی۔

آج ریکارڈ کیے گئے کم سے کم درجہ حرارت: لہہ منفی 11، اسکردومنفی10، گلگت، گوپس، استور، سری نگرمنفی 05، کالام منفی 04 اور ہنزہ میں منفی 03ڈگری سینٹی گریڈ ریکارڈ کیا گیا۔