کراچی کے مقامی ہوٹل مہران میں آتشزدگی کے باعث ویمنز نیشنل ون ڈے کپ ملتوی کردیا گیا۔
ذرائع کے مطابق ویمن نیشنل ون ڈے کپ کی تمام ٹیمیں آگ سے متاثرہ ہوٹل میں ٹھہری ہوئی تھیں۔ جنہیں باحفاظت نکال لیا گیا۔ذرائع کا کہنا ہے کہ خواتین کھلاڑیوں کی حفاظت اور صحت کے لیے نیشنل ون ڈے کپ ملتوی کیا جارہا ہے۔
ذرائع کے مطابق کراچی کے دوسرے کسی ہوٹل میں بیک وقت اتنے کمرے دستیاب نہیں تھے، اس لیے ویمنز نیشنل ون ڈے کپ ملتوی کیا گیا ہے۔ذرائع نے بتایا کہ ویمن ٹیموں کی تمام کھلاڑیوں کو ایونٹ ملتوی کیے جانے کے بعد گھر جانے کی ہدایت کردی گئی ہے۔خیال رہے کہ کراچی کی شاہراہ فیصل پر واقع ہوٹل کی تیسری منزل پر پیر کو لگنے والی آگ پر قابو پالیا گیا ہے۔ریسکیو 1122 سندھ کے حکام نے ایک بیان میں بتایا کہ شاہراہ فیصل پر مہران ہوٹل کے قریب آگ لگنے کی اطلاع موصول ہوئی جس کے بعد ریسکیو ٹیم، ایمبولینس اور 2 فائر بریگیڈ فوری طور پر جائے وقوع پر پہنچ گئے۔ریسکیو 1122 نے کہا کہ ابتدائی طور پر اس کے عملے کو ہوٹل کی تیسری منزل میں دھوئیں کی شدت کی وجہ سے داخل ہونے میں مشکلات کا سامنا کرنا پڑا جہاں آگ لگنے کی رپورٹ موصول ہوئی تھی۔بعد ازاں ریسکیو 1122 کا عملہ کھڑکیوں کے شیشے توڑ کر وہاں پہنچنے میں کامیاب رہا۔دوپہر 2 بجے کے قریب ریسکیو 1122 نے اپ ڈیٹ جاری کی کہ آگ پر قابو پا لیا گیا ہے، کولنگ کا عمل جاری ہے۔بیان کے مطابق آگ لگنے کے نتیجے میں کوئی جانی نقصان نہیں ہوا، ریسکیو سروس کے مطابق آگ پر قابو پانے میں 4 فائر بریگیڈ اور 2 واٹر بازر نے حصہ لیا۔ہوٹل میں موجود افراد کوبھی بحفاظت نکالاگیا، فائر بریگیڈ حکام کا کہنا تھا کہ آگ لگنے کی وجوہات اب تک سامنے نہیں آسکیں
