احتجاج کی اجازت قانون اور ضابطوں کے مطابق ہوتی ہے . طلال چوہدری

پاکستان مسلم لیگ (ن) کے رہنما طلال چوہدری نے جماعت اسلامی کی حالیہ گرفتاریوں اور احتجاجی کارروائیوں پر تنقید کی ہے، اور کہا ہے کہ جماعت اسلامی نے اتنے ووٹ بھی نہیں لیے جتنی گرفتاریوں کا دعویٰ کیا جا رہا ہے۔نجی ٹی وی کے پروگرام میں گفتگو کرتے ہوئے طلال چوہدری نے واضح کیا کہ احتجاج کا حق قانون اور ضابطوں کے مطابق ہونا چاہیے، اور احتجاج اور انتشار کے درمیان فرق کرنا ضروری ہے۔ ان کا کہنا تھا کہ جو لوگ قانون کے مطابق احتجاج کریں، انہیں بار بار احتجاج کرنے کا حق حاصل ہونا چاہیے۔طلال چوہدری نے کہا کہ وہ اسلام آباد سے نکلے ہیں اور وہاں چند چھوٹی ٹولیاں احتجاج کے لیے نکلی ہیں، جن میں سے ایک دو جگہوں پر بیس، تیس نوجوان موجود ہیں۔ انہوں نے کہا کہ کوئی بڑا احتجاج نظر نہیں آ رہا اور اگر احتجاج لوگوں کے کاروبار اور روزمرہ کی زندگی میں رکاوٹ ڈالے گا تو پھر حکومت کا کیا کام ہے۔
مسلم لیگ (ن) کے رہنما نے اس بات پر بھی زور دیا کہ اس اسمبلی کے ہوتے ہوئے پی ٹی آئی کے کسی بھی "ایڈونچر” کا کوئی امکان نہیں ہے۔ انہوں نے کہا کہ اپوزیشن کے پانچ سال آسان نہیں ہوتے، اور موجودہ اسمبلی کے دوران حکومت کی تبدیلی کا کوئی امکان نہیں ہے۔طلال چوہدری کی یہ باتیں اس وقت سامنے آئی ہیں جب جماعت اسلامی اور دیگر اپوزیشن جماعتوں نے احتجاجی کارروائیوں کا آغاز کیا ہے، اور حکومت کی پالیسیوں اور اقدامات پر سوالات اٹھائے جا رہے ہیں۔