شیخوپورہ:پارکنگ، ہوٹلزاور سروس اسٹیشنز کی آڑ میں سینکڑوں غیرقانونی ڈمپنگ اسٹیشن قائم، آئل ٹینکرز سے تیل چوری کرکے فروخت کیا جارہا ہے

باغی ٹی وی: شیخوپور(محمد طلال سے) شیخوپورہ سرگودھا روڈ کی آبادی ماچھیکے اور اسکے قرب میں 100سے زائد ڈمپنگ اسٹیشنز کے قائم ہونے کا انکشاف ہوا ہے جن میں پارکنگ، ہوٹلزاور سروس اسٹیشنز کی آڑ میں غیر قانونی طور پر مختلف ملٹی نیشنل کمپنیوں کے آئل ڈپوز سے سپلائی کی خاطر تیل لوڈ کروا کر آنیوالے آئل ٹینکروں سے تیل نکالا اور اسے ملاوٹ کرکے فروخت کیا جارہا ہے، ذرائع کے مطابق ان ڈمپنگ اسٹیشنز مالکان کے پاس اس غیر قانونی دھندے کا کوئی قانونی جواز موجود نہیں جس کے باوجود ضلعی انتظامیہ اور پولیس سمیت دیگر متعلقہ ادارے کاروائی سے گریزاں ہیں جس کی بنیادی وجہ ان ڈمپنگ اسٹیشنز مالکان سے حاصل ہونے والی ماہانہ بھتہ کی کمائی بیان کی جارہی ہے، ذرائع کے مطابق مختلف آئل کمپنیوں سے مقامی فیکٹریوں اور شیخوپورہ سمیت دیگر اضلاع کے پٹرول پمپس کو آئل سپلائی کرنے والے آئل ٹینکرز کا عملہ ان ڈمپنگ اسٹیشنوں پر غیر قانونی طور پر آئل نکلوالتا ہے اور اس نکالے گئے آئل کو ڈمپنگ اسٹیشن مالکان کیمیکل کی ملاوٹ کے بعد نہ صرف مقامی پٹرول پمپس بلکہ شہر کے مختلف علاقوں میں قائم غیر قانونی آئل ایجنسیوں کو فروخت کررہے ہیں اور یہ مکروہ دھندہ ایک عرصہ سے نہایت منظم انداز سے جاری اس غیرقانونی کام کے ذریعے ڈمپنگ اسٹیشنزمالکان اور آئل ٹینکرز کا عملہ خوب کمائی کررہا ہے ذرائع کے مطابق ان ڈمپنگ اسٹیشنز کے مالکان بااثر ہونے کے باعث کارروائی سے محفوظ ہیں جبکہ ضلعی انتظامیہ،پولیس اور دیگر قانون نافذ کرنیوالے اداروں کے بعض کرپٹ افسران و ملازمین مبینہ طور پر کرپشن و لاقانونیت کی اس بہتی گنگا میں ہاتھ دھو رہے ہیں یہی وجہ ہے کہ وہ ان کے خلاف کسی طرح کی موثر کارروائی نہیں ہوپاتی جبکہ عوامی سماجی حلقوں کی جانب سے توجہ طلبی کی غرض سے حکام بالا کو کی گئیں تحریری درخواستیں دی گئیں ،انہیں ردی کی ٹوکری کی نذر کردیاگیا اور کوئی کاروائی نہیں کی گئی، ذرائع کا کہنا ہے کہ انڈمپنگ اسٹیشن مالکان کے ماچھیکے میں قائم 16ملٹی نیشنل آئل کمپنیوں کے ڈپوؤں میں تعینات بعض افسران و ملازمین سے بھی ہاتھ ملے ہوئے ہیں جو ٹینکرز سے چوری کئے جانیوالے تیل کا حصہ وصول کرتے ہیں واضح رہے کہ ان ڈمپنگ اسٹیشنزپر آئل چوری کے دوران متعدد بار آتشزدگی کے دلخراش اور ہولناک واقعات رونماہوچکے ہیں جن میں آئل ٹینکرز اوراملاک کو شدید نقصان پہنچنے سمیت درجنو ں انسانی جانیں اب تک لقمہ اجل بن چکی ہیں،عوامی سماجی حلقوں نے مطالبہ کیا ہے کہ اعلیٰ حکام صورتحال کا فوری نوٹس لیں اور ان غیرقانونی ڈمپنگ اسٹیشنزکا خاتمہ یقینی بنائیں اور ان تمام افراد کے خلاف بھی کارروائی کی جائے جن کا اس غیر قانونی اور خطرناک دھندے میں کسی طرح کا کوئی بھی کردار ہے۔