اسماعیل ہنیہ کی شہادت تہران کے گیسٹ ہاؤس میں نصب ریموٹ کنٹرول بم سے ہوئی، نیو یارک ٹائمز کا دعویٰ
![ismail hania](https://baaghitv.com/wp-content/uploads/2024/08/ismail-hainia-hamas-905x564.webp)
واشنگٹن: امریکی اخبار نیو یارک ٹائمز نے اپنی تازہ ترین رپورٹ میں دعویٰ کیا ہے کہ حماس کے سیاسی سربراہ اسماعیل ہنیہ کی شہادت تہران کے گیسٹ ہاؤس میں نصب ریموٹ کنٹرول بم سے ہوئی۔ رپورٹ کے مطابق یہ بم دو ماہ قبل اِس اہم ترین عمارت میں اسمگل کیا گیا تھا۔نیو یارک ٹائمز کی رپورٹ میں بتایا گیا ہے کہ شمالی تہران میں واقع یہ گیسٹ ہاؤس ایک بڑے کمپاؤنڈ کا حصہ ہے جس کی سیکیورٹی پاسدارانِ انقلاب کے پاس ہے۔ بم کو ریموٹ کنٹرول سے اُس وقت پھاڑا گیا جب اسماعیل ہنیہ کی اپنے کمرے میں موجودگی کی تصدیق ہو گئی۔ دھماکے میں ان کا ذاتی محافظ بھی شہید ہوا۔ دھماکے سے عمارت کی کھڑکیاں ٹوٹ گئیں اور باہری دیوار جزوی طور پر گر گئی۔
رپورٹ کے مطابق اسماعیل ہنیہ تہران کے دوروں کے دوران کئی مرتبہ اس گیسٹ ہاؤس میں قیام کر چکے تھے۔ ایرانی حکام، حماس اور کئی امریکی اہلکاروں کا ماننا ہے کہ اس حملے کا ذمہ دار اسرائیل ہے۔ اگرچہ اسرائیل نے حملے کی ذمہ داری قبول نہیں کی، لیکن اسرائیلی انٹیلی جنس اہلکاروں نے حملے کے فوراً بعد امریکا اور دیگر مغربی حکومتوں کے ساتھ آپریشن کی تفصیلات شیئر کیں۔رپورٹ میں یہ بھی کہا گیا ہے کہ بم کو گیسٹ ہاؤس میں کیسے پہنچایا گیا، یہ ابھی واضح نہیں ہے، لیکن اسماعیل ہنیہ کے قتل کی پلاننگ اور کمپاؤنڈ کی نگرانی بظاہر کئی مہینوں تک کی گئی تھی۔ اسماعیل ہنیہ سے ملحقہ کمرے میں فلسطینی اسلامک جہاد کے رہنما زیاد النخالا ٹھہرے ہوئے تھے لیکن ان کے کمرے کو کچھ بھی نہیں ہوا، جس سے ظاہر ہوتا ہے کہ حملے کا ہدف صرف اسماعیل ہنیہ تھے۔