کوئی بھی معاہدہ کرنے سے قبل حکومت قوم کو اعتماد میں لے.صدر مرکزی مسلم لیگ
پاکستان مرکزی مسلم لیگ کے صدر خالد مسعود سندھو نے کہا ہے کہ آئی ایم ایف وفد کے پاکستان دورے کی تفصیلات کو منظر عام پر لایا جائے، حکومت وفد کے دورے کو خفیہ رکھ کر کیا کھچڑی پکا رہی؟بجٹ پاکستان کا اور ہدایات آئی ایم ایف کی، یہ پاکستان کی خودمختاری کے خلاف ہے،آئی ایم ایف سے جان چھڑانے کے لئے حکومت اپنی عیاشیاں کم ،آئی ایم ایف سے کوئی بھی معاہدہ کرنے سے قبل قوم کو اعتماد میں لے.
خالد مسعود سندھو کا کہنا تھا کہ بجٹ کی تیاری کے لئے آئی ایم ایف کے وفد کی پاکستان آمد پر حکومت کی جانب سے دورے کی تفصیلات کو خفیہ رکھنا سمجھ سے بالاتر ہے، حکومت پاکستان کے قومی مفادات کو مد نظر رکھتے ہوئے فیصلے کرے،حکمرانوں کی عیاشیوں کی وجہ سے ملک میں غربت ہے اور قوم قرضوں میں جکڑی جا رہی ہے،حکومت اپنی فضول خرچیاں کم کرے، وزیروں اور مشیروں کی فوج ظفر موج کو کم کرے، حکومت کو آئی ایم ایف سمیت کسی بین الاقوامی ادارے کی ڈکٹیشن پر نہیں چلنا چاہیے۔
خالد مسعود سندھو کا مزید کہنا تھا کہ پاکستان آزاد و خود مختار ملک ہے،آئی ایم ایف کی ہدایات پر تیار ہونے والا بجٹ عوامی نہیں بلکہ قوم کو مزید غربت کی طرف دھکیلے گا،حکمران قرض پر قرض لیتے جا رہے ہیں اور عوام غریب سے غریب تر ہوتی چلی جا رہی ہے، قرضوں کے بوجھ کا ذمہ دار کون ہے اس کا احتساب بھی ہونا چاہئے،آئی ایم ایف سے قرض کن شرائط پر لیا جا رہا اسکی تفصیلات بھی قوم کے سامنے لائی جائے.
