تحریک انصاف (پی ٹی آئی) کے بانی اور سابق وزیراعظم عمران خان کا جیل میں طبی معائنہ کیا گیا ہے۔ جیل ذرائع کے مطابق، پمز اسپتال کی ڈاکٹرز کی ٹیم نے عمران خان کا مکمل طبی معائنہ کیا اور ان کے کانوں اور دانتوں کا بھی چیک اپ کیا گیا۔
ذرائع نے بتایا کہ ڈاکٹرز نے عمران خان کے کانوں اور دانتوں کی صفائی کا عمل بھی مکمل کیا اور ان کی صحت کے حوالے سے تفصیلی جائزہ لیا۔ طبی معائنے کے بعد ڈاکٹرز نے عمران خان کو مکمل طور پر صحت یاب قرار دیا ہے۔جیل حکام کا کہنا ہے کہ معائنے کے دوران عمران خان کے کچھ مخصوص ٹیسٹ بھی تجویز کیے گئے ہیں تاکہ ان کی صحت کی بہتر مانیٹرنگ کی جا سکے۔ اس حوالے سے عمران خان نے اپنی دندان ساز ڈاکٹر عاصم کو بلانے کی درخواست بھی کی تاکہ وہ دانتوں کے مزید معائنے اور علاج میں معاونت فراہم کر سکیں۔
مزید برآں، جیل ذرائع نے تصدیق کی کہ عمران خان کے طبی معائنے کی مکمل رپورٹ جلد اسلام آباد ہائیکورٹ میں جمع کرائی جائے گی، جہاں ان کے کیس کی سماعت جاری ہے۔ اس رپورٹ کو عدالت میں بطور طبی ثبوت پیش کیا جائے گا تاکہ عمران خان کی صحت سے متعلق صورتحال واضح کی جا سکے۔
