عمران خان کی صحت کو شدید خطرات لاحق ہیں،وکیل فیصل چوہدری کا دعویٰ

سابق وزیراعظم اور پاکستان تحریک انصاف (پی ٹی آئی) کے بانی عمران خان کے وکیل، فیصل چوہدری نے کہا ہے کہ ان کے موکل کو جیل میں غیر انسانی سلوک کا سامنا ہے اور انہیں بنیادی ضروریات تک فراہم نہیں کی جا رہی ہیں۔

پریس کانفرنس سے خطاب کرتے ہوئے فیصل چوہدری نے کہا کہ ’’بانیٔ پی ٹی آئی عمران خان کو ٹھیک سے کھانا بھی نہیں دیا جا رہا تھا۔ ان کے ساتھ سلوک غیر انسانی ہے۔‘‘فیصل چوہدری نے بتایا کہ حالیہ دنوں میں جیل حکام نے ان سے ملاقات کی درخواست پر کوئی جواب نہیں دیا، اور جب اس بارے میں عدالت سے رجوع کیا گیا تو عدالت نے تفتیشی افسر کو ڈھائی بجے طلب کیا۔ ’’ہم نے عدالت کو آگاہ کیا ہے کہ اکتوبر کے مہینے میں عمران خان کے ساتھ غیر انسانی سلوک کیا گیا، جس پر پارٹی کو سخت تشویش ہے۔‘‘پارٹی کی قانونی ٹیم اس بات سے پریشان ہے کہ بانیٔ پی ٹی آئی کی صحت اور ان کی حفاظت کو شدید خطرات لاحق ہیں۔عمران خان سے ایکسرسائز مشین واپس لے لی گئی ہے اور جیل حکام اور پولیس افسران مسلسل ٹال مٹول کر رہے ہیں۔ جب بھی کسی نوعیت کا واقعہ پیش آتا ہے، ان سے ملاقات بند کر دی جاتی ہے۔‘‘

فیصل چوہدری نے مطالبہ کیا کہ بانیٔ پی ٹی آئی کو انسانی حقوق کے مطابق سہولتیں فراہم کی جائیں اور ان کی قانونی حقوق کا احترام کیا جائے تاکہ وہ اپیل کے عمل کو آگے بڑھا سکیں۔