بانی پاکستان تحریک انصاف (پی ٹی آئی) نے وزیر اعلیٰ پنجاب پر مقدمے کیلئے کیپیٹل پولیس آفیسر (سی پی او) کو درخواست دے دی۔
بانی پی ٹی آئی کے وکیل تابش فاروق نے درخواست کوریئر سروس کے ذریعے سی پی او آفس بھیجی، وکیل نے وزیراعلیٰ پنجاب سمیت 8 ارکان کے خلاف مقدمہ درج کرنے کی درخواست دی ہے۔درخواست میں اسسٹنٹ سپرنٹنڈنٹ آف پولیس (اے ایس پی) زینب، اسٹیشن ہاؤس آفیسر (ایس ایچ او) اعزاز کو بھی فریق بنایا گیا ہے، درخواست میں سپرنٹنڈنٹ جیل سمیت 8 افراد کے خلاف مقدمے کے لیے نام شامل ہیں۔درخواست میں بانی پی ٹی آئی کو قید میں سہولیات نہ ملنے کا نقطہ اٹھایا گیا اور کہا گیا ہے کہ بانی پی ٹی آئی کو وزیراعلیٰ کی ہدایت پر جیل میں قیدی کے حقوق تک نہیں دیے جا رہے، بانی پی ٹی آئی کے سیل میں روشنی تک نہیں۔متن میں کہا گیا کہ بانی پی ٹی آئی کے اہل خانہ کو ملاقات تک کی اجازت نہیں، ان کے خلاف یہ تمام اقدامات مریم نواز کی ایماء پر کیے جارہے ہیں، اڈیالہ جیل پنجاب کی حدود میں آتا ہے، مریم نواز ماضی میں دھمکیاں دے چکی ہیں، مریم نواز نے دھمکیاں دیں کہ بانی پی ٹی آئی ایک فتنہ ہیں جسے ختم کیا جا رہا ہے۔درخواست میں کہا گیا کہ اے ایس پی اور ایس ایچ او سمیت چوکی انچارج باہم مشورے سے اہل خانہ کو ہراساں کرتے ہیں، بانی پی ٹی آئی کے خلاف اقدامات اور بہنوں سے نہ ملنے پر ہائیکورٹ کے حکم کی خلاف ورزی کی جارہی ہے، مریم نواز سمیت 8 افراد کے خلاف مقدمہ درج کیا جائے
