راولپنڈی: اڈیالہ جیل میں پاکستان تحریک انصاف (پی ٹی آئی) کے بانی عمران خان سے ملاقات کا دن تھا، تاہم حیران کن طور پر کوئی بھی رہنما، وکیل یا فیملی ممبر ان سے ملاقات کے لیے نہیں پہنچا۔
عمران خان سے ملاقات کے لیے اڈیالہ جیل میں معمول کے مطابق ملاقات کا دن مقرر تھا، تاہم آج اس دن پر کسی بھی پارٹی رہنما یا وکیل کی طرف سے جیل میں ان سے ملاقات کرنے کی کوشش نہیں کی گئی۔مذاکراتی کمیٹی کا کوئی رکن بھی جیل نہیں آیا، حالانکہ کمیٹی کی جانب سے بات چیت کے سلسلے میں ملاقاتوں کا تذکرہ کیا گیا تھا۔ اس بارے میں پی ٹی آئی کے وکیل فیصل چوہدری نے بتایا کہ مذاکراتی کمیٹی کو تاحال ملاقات کی اجازت نہیں ملی ہے، جس کی وجہ سے وہ جیل میں عمران خان سے ملاقات کرنے میں ناکام رہے ہیں۔
جیل ذرائع کے مطابق اڈیالہ جیل میں عمران خان سے ملاقات کے لیے منگل اور جمعرات کے دن مخصوص کیے گئے ہیں۔ جیل کے مینوئل کے مطابق، آج ملاقاتوں کا وقت بھی ختم ہو چکا ہے، تاہم عام طور پر ملاقات کی اجازت ملنے یا نہ ملنے کے باوجود پارٹی کے رہنما اور وکلاء جیل پہنچ کر ملاقات کی کوشش کرتے ہیں۔اس حوالے سے جیل ذرائع نے مزید بتایا کہ اگرچہ ملاقات کا وقت ختم ہو چکا تھا، لیکن اس کے باوجود بھی کسی طرح کی ملاقات کی اجازت نہ ملنے پر پارٹی کی طرف سے کوئی ردعمل سامنے نہیں آیا۔
اس دوران عمران خان کی رہائی اور ان کے مقدمات پر بات چیت کی توقع کی جارہی تھی، مگر آج کے دن ملاقات کا نہ ہونا ایک اہم موضوع بن چکا ہے۔اب دیکھنا یہ ہوگا کہ آئندہ دنوں میں عمران خان کے ساتھ ملاقات کے لیے مذاکراتی کمیٹی کی کوششیں کامیاب ہو پاتی ہیں یا نہیں، اور کیا ان ملاقاتوں سے پاکستان تحریک انصاف کے رہنماؤں کی حکمت عملی میں کوئی تبدیلی آتی ہے۔
