سرگودھا : چونگی نمبر 9 پر ایک اور یوٹیلیٹی سٹور کا افتتاح

سرگودھا،باغی ٹی وی(ملک شاہنوازجالپ،نامہ نگار ، ) جاوید مشتاق زونل منیجر یوٹیلیٹی سٹورز نے چونگی نمبر 9 پر ایک اور سپر یوٹیلیٹی سٹور کا افتتاح کر دیا، افتتاح کے موقع پر ریجنل منیجر علی امیر بھٹی بھی ان کے ہمراہ تھے، اس موقع پر زونل منیجر کا کہنا تھا کہ چونگی نمبر 9 پر یوٹیلٹی سٹورز کا قیام نواب کالونی، بشیر کالونی اور مقامی آبادیوں کا دیرینہ مطالبہ تھا، آج اس کا آغاز کیا ہے، حکومت کی طرف سے سٹورز پر 9 آئٹمز ایسے ہیں جن پر رمضان میں خصوصی سبسڈی دی گئی، جن میں ضروریات زندگی کی بنیادی تمام اشیاءشامل ہیں اور یوٹیلٹی سٹورز پر سامان وافر مقدار میں موجود ہے، اسی طرح بے نظیر انکم سپورٹ کے اہل افراد کو بھی یہاں سے سبسڈی دینے کا سلسلہ جاری ہے، اس کے ساتھ ساتھ جو بیرون ملک سے ہمارے بھائی سرمایہ پاکستان بھیجتے ہیں ان کے عزیز و اقارب کے لئے بھی سوہنی دھرتی کے نام سے ایک پروگرام چل رہا ہے، جس میں وہ اپنے جمع پوائنٹس لے کر آتے ہیں اور بغیر کسی معاوضہ کے اپنے پوائنٹس کے متبادل خریداری کا سامان لے کر جاتے ہیں، اس موقع پر زونل چیئر مین علی امیر بھٹی نے بتایا کہ سرگودھا میں 27 یوٹیلیٹی سٹورز کی شکل میں عوامی خدمت کے مرکز قائم ہیں، اس سٹور سے چونگی نمبر 9 کے گرد 20 سے 25 ہزار کی آبادی مستفید ہو گی، ہمارے سٹور عوامی خدمت کےلئے ہر وقت کوشاں ہیں، جبکہ اس موقع پر جاوید مشتاق نے یوٹیلٹی سٹورز کے عملہ کو آنے والے صارفین کے ساتھ خوش اسلوبی سے پیش آنے اور اچھی سروسز فراہم کرنے کی ہدایات کی۔