بھارت پاکستان کا ازلی دشمن ہے، دوبارہ جنگ چاہتا ہے تو قوم تیار ہے، خالد مسعود سندھو

پاکستان مرکزی مسلم لیگ کے رہنماؤں نے کہا ہے کہ بھارت کو میدان میں شکست ہو چکی، مودی کی گیدڑ بھبھکیوں کو بھارتی قوم بھی سمجھنے لگ گئی ہے، بلوچستان میں حملہ بھارتی پراکیسز کے ذریعے کیا گیا،بھارتی جارحیت،دہشتگردی کے خلاف قوم متحد ہے، آپریشن بنیان مرصوص کی کامیابی نے دنیا کے سامنے پاکستان کی عسکری صلاحیتوں ،قوم کے اتحاد کا بول بالا کر دیا ،مودی پانی پر جنگ لڑنا چاہتا ہے تو پاکستانی قوم تیار ہے.

ان خیالات کا اظہار پاکستان مرکزی مسلم لیگ کے صدر خالد مسعود سندھو، جوائنٹ سیکرٹری قاری محمد یعقوب شیخ، ڈپٹی سیکرٹری جنرل حافظ خالد نیک، انجینئر حارث ڈار،صدر سندھ فیصل ندیم، محمد سرور چوہدری، حافظ عمران لیاقت بھٹی، عارف اللہ خٹک و دیگر نے خطبات جمعہ کے اجتماعات سے خطاب اور بعد ازاں کارکنان کے وفود سے ملاقاتوں کے دوران گفتگو کرتے ہوئے کیا،خطبات جمعہ کے دوران آپریشن بنیان مرصوص کی کامیابی پر افواج پاکستان کو خراج تحسین پیش کرنے کی قراردادیں پیش کی گئیں وہیں بھارتی جارحیت، بلوچستان میں بھارتی دہشتگردی،بھارتی آبی جارحیت کی بھی مذمت کی گئی.علماء کرام نے خطبات جمعہ میں اسرائیلی فوج کے غزہ کے باسیوں پر مظالم کی بھی مذمت کی ،نماز جمعہ کے بعد بھارتی جارحیت میں شہید ہونے والے معصوم شہریوں،سیکورٹی فورسز کے جوانوں اور خضدار حملے کے شہیدوں کے لئے دعا بھی کی گئی.

مرکزی مسلم لیگ کے صدر خالد مسعود سندھو کا کہنا تھا کہ آپریشن بنیان مرصوص نے ایک بار پھر ثابت کر دیا ہے کہ پاکستان کے محافظ ہر خطرے کا منہ توڑ جواب دینے کی مکمل صلاحیت رکھتے ہیں۔ قوم کو اپنے دفاعی اداروں پر فخر ہے۔ قاری محمد یعقوب شیخ نے خطبہ جمعہ میں کہا کہ بھارتی آبی جارحیت دراصل پاکستان کی زرعی معیشت پر حملہ ہے، جس کا ہر سطح پر منہ توڑ جواب دیا جانا چاہیے۔ یہ مسئلہ صرف سیاسی نہیں بلکہ قومی بقا کا ہے،ڈپٹی سیکرٹری جنرل حافظ خالد نیک نے اسرائیل کی جانب سے غزہ میں جاری مظالم پر شدید الفاظ میں مذمت کرتے ہوئے کہا کہ "امت مسلمہ کو اب صرف مذمت سے آگے بڑھ کر عملی اقدامات اٹھانے ہوں گے، بھارت اور اسرائیل کا گٹھ جوڑ دراصل اسلام دشمنی کی علامت ہے،بلوچستان اور خیبر پختونخوا میں بھارت کی ایجنٹوں کے ذریعے دہشت گردی قابل مذمت ہے،

مرکزی مسلم لیگ کے رہنماؤں فیصل ندیم، محمد سرور چوہدری، عارف اللہ خٹک،حافظ عمران لیاقت بھٹی کا کہنا تھا کہ بھارت اور اسرائیل کی اسلام دشمن پالیسیاں کسی سے ڈھکی چھپی نہیں رہیں، بھارتی جنگی جنون، آبی دہشتگردی اور پاکستان کو عدم استحکام سے دوچار کرنے کی تمام مذموم سازشیں ناکام ہوں گی، عوام پاکستان، افواج پاکستان متحد و بیدار اور منہ توڑ جواب دینےکو تیار ہیں.