وفاقی وزیر اطلاعات و نشریات عطاء اللہ تارڑ نے عالمی نشریاتی ادارے "سی این این” سے گفتگو کرتے ہوئے بھارت کی جانب سے پاکستان پر الزامات عائد کرنے پر سخت ردعمل کا اظہار کیا۔ بھارت نے بغیر کسی شواہد کے پاکستان پر الزامات لگائے ہیں، اور وہ پہلگام واقعہ کا ذمہ دار خود ہے۔
عطاء اللہ تارڑ نے کہا کہ بھارت کے پاس پاکستان کے خلاف الزامات کو ثابت کرنے کے لئے کوئی ٹھوس شواہد نہیں ہیں۔ "ہمارے پاس مستند انٹیلی جنس اطلاعات تھیں کہ بھارت پاکستان پر حملہ کرنے کی کوشش کرے گا،” پاکستان ایک ذمہ دار ریاست ہے اور اقوام متحدہ کی سلامتی کونسل کا غیر مستقل رکن ہونے کی حیثیت سے اس کا فرض بنتا ہے کہ وہ عالمی برادری کے ساتھ ایسی اہم معلومات شیئر کرے۔
عطاء اللہ تارڑ نے پاک فوج کی بہادری اور پیشہ ورانہ صلاحیتوں کا ذکر کرتے ہوئے کہا کہ "پاک فوج ایک بہادر فورس ہے جو وطن عزیز کا دفاع کرنا جانتی ہے۔” انہوں نے مزید کہا کہ پاکستان کے عوام اپنے ملک کے دفاع میں متحد ہیں اور اس بات کا عزم رکھتے ہیں کہ وطن عزیز کا ہر قیمت پر دفاع کیا جائے گا۔پاکستان کے حوالے سے عطاء اللہ تارڑ کا کہنا تھا کہ پاکستان ایک پرامن ملک ہے اور ہمیشہ سے پرامن بقائے باہمی کا خواہاں رہا ہے۔ "پاکستان اپنے دفاع کا حق رکھتا ہے اور ہم اپنے دفاع کو یقینی بنائیں گے۔”وفاقی وزیر اطلاعات نے کہا کہ پاکستان نے پہلگام واقعہ کی منصفانہ اور شفاف تحقیقات کی پیشکش کی تھی لیکن بھارت نے بغیر تحقیقات کے الزامات عائد کیے اور انگلی اٹھانا جاری رکھا۔ انہوں نے مزید کہا کہ "ماضی میں بھی بھارت نے بغیر تحقیقات کے ایسے الزامات پاکستان پر عائد کیے ہیں۔”
عطاء اللہ تارڑ نے سوال کیا کہ "کیا بھارت کے پاس کوئی شواہد ہیں کہ پہلگام حملے میں ملوث شدت پسند پاکستان میں مقیم ہیں؟” ان کا کہنا تھا کہ بھارت ابھی تک کسی بھی گروپ کا تعین نہیں کر سکا جو اس واقعے میں ملوث ہو۔انہوں نے کہا کہ "بھارت کو دنیا کو بتانا ہوگا کہ اس حملے میں کون ملوث ہے۔ صرف یہ الزام عائد نہیں کیا جا سکتا کہ اس کے پیچھے پاکستان ہے۔” انہوں نے مزید کہا کہ پاکستان نے اس واقعے پر منصفانہ اور غیر جانبدارانہ تحقیقات کی پیشکش بھی کی تھی، جس کا بھارت نے کوئی جواب نہیں دیا۔عطاء اللہ تارڑ نے یہ بھی کہا کہ پاکستان اپنے دوست ممالک کے ساتھ رابطے میں ہے اور ہم اپنا نکتہ نظر عالمی برادری کے سامنے پیش کر رہے ہیں۔ "اس ساری صورتحال میں پاکستان نہ تو جارح ہے اور نہ ہی اشتعال دلانے والا ہے۔”انہوں نے واضح کیا کہ پاکستان کشیدگی میں اضافے میں ملوث نہیں ہے، اور پاکستان اپنے دفاع کا حق استعمال کرے گا۔ "پاکستان کی مسلح افواج چوکس ہیں اور کسی بھی جارحیت کا مقابلہ کرنے کے لئے تیار ہیں۔”
عطاء اللہ تارڑ کی اس گفتگو سے یہ واضح ہوا کہ پاکستان اپنے دفاع میں پوری طرح سے پرعزم ہے اور عالمی سطح پر اپنی پوزیشن کو مستحکم کرنے کے لئے کوششیں جاری رکھے ہوئے ہے۔
