دبئی: چیمپئنز ٹرافی 2025 کے پہلے سیمی فائنل میں بھارت نے آسٹریلیا کو 4 وکٹوں سے شکست دے کر فائنل کے لیے کوالیفائی کرلیا۔ دبئی انٹرنیشنل کرکٹ اسٹیڈیم میں کھیلا گیا یہ میچ ایک سنسنی خیز مقابلہ بن گیا۔
آسٹریلیا نے ٹاس جیت کر پہلے بیٹنگ کا فیصلہ کیا اور اپنی اننگز کا آغاز کیا۔ آسٹریلوی ٹیم نے اننگز کے آخری اوور میں 264 رنز کا مجموعہ تشکیل دیا، جس کے بعد بھارت کے سامنے 265 رنز کا ہدف تھا۔ بھارت نے اس ہدف کو 49 ویں اوور میں 6 وکٹوں کے نقصان پر مکمل کرلیا اور فائنل میں جگہ بنائی۔آسٹریلوی ٹیم کی جانب سے کپتان اسٹیو اسمتھ نے شاندار 73 رنز کی اننگز کھیلی، جبکہ ایلکس کیری نے 61 رنز اسکور کیے۔ اوپنر ٹریوس ہیڈ 39 رنز پر رن آؤٹ ہوئے اور باقی کھلاڑی بڑی اننگز کھیلنے میں ناکام رہے۔بھارت کے باؤلرز نے بہترین کارکردگی کا مظاہرہ کیا۔ محمد شامی نے 3 وکٹیں حاصل کیں، جبکہ جدیجا اور ورون چکرورتھی نے 2، 2 کھلاڑیوں کو آؤٹ کیا۔
جواب میں بھارت نے 265 رنز کا ہدف 49 ویں اوور میں 6 وکٹوں کے نقصان پر پورا کرلیا۔ ویرات کوہلی نے شاندار 84 رنز کی اننگز کھیلی اور مین آف دی میچ قرار پائے۔ ان کے علاوہ شریاس ایئر نے 45 رنز اسکور کیے، جبکہ ہاردیک پانڈیا اور روہت شرما نے 28، 28 رنز بنائے۔ اکشر پٹیل نے 27 رنز بنائے اور شبمن گل 8 رنز کے سکور پر آؤٹ ہوئے۔آسٹریلیا کے باؤلرز ایڈم زمپا اور ناتھن ایلس نے 2، 2 کھلاڑیوں کو آؤٹ کیا لیکن وہ بھارت کے اس مجموعے کو روکنے میں ناکام رہے۔
بھارت کے لیے یہ پانچویں بار چیمپئنز ٹرافی کے سیمی فائنل میں پہنچنے کا موقع تھا۔ 2002 اور 2013 میں بھارت چیمپئنز ٹرافی کا فاتح رہا، جبکہ 2000 اور 2017 میں اسے فائنل میں شکست کا سامنا کرنا پڑا تھا۔
چیمپئنز ٹرافی 2025 کا دوسرا سیمی فائنل کل لاہور کے قذافی اسٹیڈیم میں نیوزی لینڈ اور جنوبی افریقا کے درمیان کھیلا جائے گا۔ فائنل اتوار 9 مارچ کو دبئی میں کھیلا جائے گا، جہاں بھارت کے حریف کا فیصلہ ہوگا۔
