بھارت نے حکومتِ پاکستان کا سوشل میڈیا اکاؤنٹ بلاک کر دیا

بھارت نے حکومتِ پاکستان کے سوشل میڈیا اکاؤنٹ کو بند کر دیا ہے، جس میں گورنمنٹ آف پاکستان کا ایکس (سابقہ ٹوئٹر) ہینڈل شامل ہے۔ یہ قدم اس وقت اٹھایا گیا ہے جب بھارت نے مقبوضہ کشمیر کے علاقے پہلگام میں سیاحوں کی ہلاکت کے بعد پاکستان کے خلاف شدید اقدامات کا اعلان کیا ہے۔

28 سیاحوں کی ہلاکت کے بعد بھارت نے پاکستان کے خلاف سخت اقدامات کی دھمکی دی تھی۔ پہلگام میں یہ ہلاکتیں ایک حملے کے نتیجے میں ہوئیں، جس کے بعد بھارت نے واہگہ اٹاری سرحد کو یکطرفہ طور پر بند کرنے کا اعلان کیا تھا۔بھارت نے سندھ طاس معاہدہ بھی یکطرفہ طور پر معطل کر دیا ہے۔ اس معاہدے کے تحت پاکستان کو بھارت سے پانی کی فراہمی کی ضمانت حاصل ہے، لیکن بھارت نے اس معاہدے کی معطلی کا فیصلہ کیا ہے۔ علاوہ ازیں بھارت نے پاکستانی شہریوں کے بھارتی ویزے بھی منسوخ کر دیے ہیں اور ہندوستان میں موجود پاکستانی شہریوں کو 48 گھنٹوں کے اندر ملک چھوڑنے کا حکم دیا ہے۔

پاکستان نے بھارت کے ان اقدامات کی شدید مذمت کی ہے اور اس کو عالمی سطح پر متنازعہ قرار دیا ہے۔ حکومت پاکستان کا کہنا ہے کہ بھارت کا یہ رویہ خطے میں امن کے لیے خطرہ بن سکتا ہے اور اس کے اثرات عالمی سطح پر بھی ظاہر ہوں گے۔