چیئرمین واپڈا نے بھارت کی جانب سے نیلم جہلم ہائیڈرو پاور پروجیکٹ کو نشانہ بنانے کی کوشش پر تفصیلات فراہم کی ہیں اور کہا کہ بھارت نے نہ صرف ڈیم کو ٹارگٹ کیا بلکہ اس کے قریب رہائش پذیر آبادی کو بھی متاثر کرنے کی کوشش کی۔
چیئرمین واپڈا نے کہا کہ بھارت کی اس کارروائی سے عالمی قوانین کی واضح خلاف ورزی ہوئی ہے اور اب اس نقصانات کا تخمینہ لگایا جا رہا ہے، جس کے لیے واپڈا کے ٹیکنیکل ماہرین سرگرم ہیں۔انہوں نے مزید بتایا کہ بھارت کا مقصد نیلم جہلم کے اسٹرکچر کو نقصان پہنچانا تھا، جس کے تحت بھارت نے ڈیم کے قریب کی آبادی کو بھی ٹارگٹ کرنے کی کوشش کی۔ نیلم جہلم ہائیڈرو پاور پروجیکٹ میں پانی کا بہت بڑا ذخیرہ موجود ہے اور بھارت کی کوشش تھی کہ اس ذخیرے کو نقصان پہنچایا جائے، لیکن ہماری فوج نے فوری طور پر جوابی کارروائی کرتے ہوئے صورتحال کو قابو میں کیا۔
چیئرمین واپڈا نے واضح کیا کہ بجلی کی پیداوار واپڈا کی ذمہ داری ہے، تاہم اس کی ترسیل کا کام واپڈا کے دائرہ کار میں نہیں آتا۔ اس کے علاوہ، اس پروجیکٹ میں کوئی غیرملکی اسٹاف شامل نہیں ہے۔
