بھارت کی کناڈا فلموں کی معروف اداکارہ رانیا راؤ پر 127 کلوگرام سونا اسمگل کرنے کے الزام میں 102 کروڑ بھارتی روپے کا بھاری جرمانہ عائد کر دیا گیا ہے۔
یہ اقدام ڈائریکٹوریٹ آف ریونیو انٹیلی جنس (DRI) کی جانب سے کیا گیا، جس میں اداکارہ سمیت تین دیگر ملزمان کو بھی سونا اسمگلنگ کے مقدمے میں نوٹس جاری کیا گیا ہے۔ذرائع کے مطابق، اداکارہ رانیا راؤ اور دیگر ملزمان پر دبئی سے 324 کلو گرام سونا اسمگل کرنے کے الزام میں مجموعی طور پر 271 کروڑ بھارتی روپے جرمانہ عائد کیا گیا ہے۔ بھارتی میڈیا کے مطابق، مرکزی ملزم اور سینئر آئی پی ایس افسر چندر راؤ کی بیٹی رانیا راؤ کو صرف 127 کلوگرام سونا اسمگل کرنے پر 102 کروڑ روپے ادا کرنا ہوں گے۔ڈی آر آئی کی جانب سے بھیجے گئے نوٹس میں جرمانے کی ادائیگی کے لیے کوئی مخصوص وقت نہیں دیا گیا، تاہم ملزمان کو ہدایت کی گئی ہے کہ نوٹس کا جواب جلد از جلد دیا جائے۔
واضح رہے کہ اداکارہ رانیا راؤ سمیت تمام ملزمان اس وقت بنگلورو سینٹرل جیل میں قید ہیں۔ رانیا راؤ نے اپنی گرفتاری کو بھارتی ہائیکورٹ میں بھی چیلنج کیا ہے۔اداکارہ رانیا راؤ کو رواں برس مارچ میں بنگلورو انٹرنیشنل ائیرپورٹ پر 14.8 کلوگرام سونا لے جاتے ہوئے گرفتار کیا گیا تھا، جس کی مارکیٹ قیمت تقریباً 12 کروڑ بھارتی روپے بتائی گئی تھی۔
