ممتاز حیدر
بھارتی فوجی انٹیلی جنس کی ایک خفیہ دستاویز کے مطابق بھارتی وزارت دفاع نے مختلف محاذوں پر تعینات سکھ اہلکاروں کی مخصوص حساس تقرریوں کے حوالے سے تشویش کا اظہار کیا ہے۔
دستاویز میں فوجی کمانڈز کو سخت ہدایات دی گئی ہیں کہ سکھ اہلکاروں کی جانچ پڑتال کو مزید سخت بنایا جائے،یہ خفیہ ہدایت نامہ، جو 29 اپریل 2025 کو ڈائریکٹر جنرل ملٹری انٹیلی جنس کی جانب سے جاری کیا گیا، "ڈیپلائمنٹ پروٹوکول ، سکھ اہلکار برائے حساس تقرریاں” کے عنوان سے سامنے آیا ہے۔ اس میں کہا گیا ہے کہ حالیہ انٹیلی جنس رپورٹس سے پتا چلا ہے کہ محدود تعداد میں سکھ فوجی اہلکاروں میں نظریاتی کمزوری دیکھنے میں آئی ہے، جس کا سبب مبینہ طور پر خالصتانی سوچ ہے۔دستاویز کے مطابق بعض سکھ افسران اور جوان، اگرچہ مجموعی طور پر وفادار ہیں، لیکن انہوں نے پاکستان سے منسلک پنجاب سرحدی علاقوں میں براہ راست کارروائیوں پر تحفظات کا اظہار کیا ہے، جو ان کے اندر ممکنہ نظریاتی تضاد کو ظاہر کرتا ہے۔ اس قسم کی سوچ، حساس آپریشنز میں مشن کی سالمیت کے لیے خطرہ بن سکتی ہے۔فوجی کمانڈرز کو ہدایت کی گئی ہے کہ وہ حساس شعبوں میں تعینات تمام اہلکاروں کی فوری جانچ کریں ،یہ بھی کہا گیا ہے کہ کسی بھی سکھ اہلکار کو حساس ذمہ داری سونپنے سے پہلے سخت کاؤنٹر انٹیلیجنس اسکریننگ ضروری ہوگی۔
تمام کور زونز کی ملٹری انٹیلیجنس یونٹس کو ہدایت دی گئی ہے کہ وہ ہر دو ہفتے بعد ’آئیڈیالوجیکل رسک اسیسمنٹ‘ رپورٹ تیار کریں، تاکہ خطرے سے دوچار اہلکاروں کی ذہنی کیفیت اور نظریاتی جھکاؤ کا جائزہ لیا جا سکے۔تمام فارمیشن کمانڈرز کو اس ہدایت پر فوری عمل درآمد کی ہدایت دی گئی ہے، اور 72 گھنٹوں کے اندر تعمیل کی رپورٹ DG MI (ڈائریکٹر جنرل ملٹری انٹیلیجنس) کو جمع کروانے کی تاکید کی گئی ہے۔
دفاعی ماہرین کے مطابق یہ بھارتی فوج کی اصل حالت ہے۔ یہ جنگ کیسے لڑے گی،جب اس کے سپاہیوں پر ہی شک کیا جائے گا اور اتنی سخت پالیسی نافذ کی جائے گی
